Ч.ЗОТОЛ   Монгол Улсын Соёлын тэргүүний ажилтан, зураач Б.Энхмаагийн  монгол зургийн аргаар зурсан  “Торой бандийн домог” бүтээл дуудлага худалдаагаар 3.8 саяар зарагдлаа.  Дуудлага худалдаа Сүхбаатар аймгийн шилдүүдийг тодруулдаг “Гангар хун-2019” ёслолын үеэр болсон юм.  Зураач  өөрийн бүтээлд халх дөрөв, шавь тав  даяар нэрээ мөнхлөн үлдээсэн шилийн сайн эр  Торой бандийн домгийг цогцоор нь харуулахыг зорьжээ. Зурагт  Торой банди буюу Нанзад хэмээх шилийн сайн эрийн амьдарч байсан  Алтан дарь овоо, Шилийн Богд, Агтана хүрээт,  Будрын хад гэх мэт газруудыг   дүрсэлж,   хэсэг бүр дээр нь Торой Бандийн  домгийг  өгүүлэх байдлаар үйл явдлуудыг өрнүүлсэн байна. Тодруулбал жаахан шарга морийг хошууны харамч ноёноос өөрийн башир аргаар салган авсан түүх, Алтан дарь овооны бэлээс  дээш  өгсч гардаг  Торойн зам, түүний хар гэрт хоригдож байгаад өөрийн уянгалаг сайхан хоолойгоор хатуу ноёдын гараас мултарсан  зэрэг домгийг энэхүү бүтээлд шингээжээ. Зураач Б.Энхмаа нь Сүхбаатар аймгийн Онгон суманд төрсөн. 2006 онд Дүрслэх урлагийн дээд сургуулийн  Монгол зургийн ангийг төгсч   2007 оноос өнөө хүртэл Сүхбаатар аймгийн Дарьганга сумын Соёлын төвд  “Орон нутаг судлах танхим”-ын ажилтнаар ажиллаж байна.  Домог түүхт Алтан овооныхоо   бэлд  ажиллаж  амьдарч, уран бүтээлээ туурвиж яваа тэрээр   нутгийнхаа  уул ус , соёл   түүх,  домог хууч яриаг судлан   уран бүтээлдээ   шингээж  өгөхийг  зорьдог   ажээ. Эх сурвалж: www.polit.mn