Д.ДАРАМБАЗАР 

“PUBG Mobile World Invitational 2022” тэмцээн гурван өдрийн турш Саудын Арабын нийслэл Эр-Рияд хотод болж өндөрлөлөө. Хоёр сая ам.долларын шагналын сантай тус тэмцээнд бүсээ тэргүүлсэн болон зохион байгуулагч орны 18 баг урилгаар оролцож, Монгол Улсаас “Stalwart Esports” баг 180 оноотойгоор гуравдугаар байрт орлоо. Ингэснээр тэд 185 мянган ам.долларын шагналыг хүртэв.

Харин тэмцээний ялагчаар Тайландын “Vampire Esports” баг 220 оноотой тодорч, 525 мянган ам.доллар, II байрт 197 оноогоор Саудын Арабын “Team Falcons” баг шалгарч, 325 мянган ам.долларыг  хүртэв. Тэмцээний “MVP” буюу “Үнэ цэнтэй тоглогч”-оор манай улсын багийн тоглогч “Action” буюу Г.Сүхбат тодорч, 10 мянган ам.доллараар шагнууллаа.

Тэмцээний дараа "Stalwart Esports" багийнхан "PUBG WORLD INVITATIONAL 2022 тэмцээний гуравдугаар байрын шагналт хэмээн дуудуулахаар болж байна. Бидний хүсч байсан үр дүн биш байсан. Чадах бүхнээ хийсэн ч шинэ төхөөрөмж дээр дасах 16 цагийн л хугацаа л гарсан. Мөн хөвгүүдийн хувьд анхны томоохон LAN тэмцээн байлаа. Залуусаараа бахархаж байна. Дараагийн тэмцээнээрээ уулзъя" хэмээн цахим хуудаснаа бичжээ.

Эх сурвалж: www.polit.mn