Р.ОЮУН Томуу, томуу төст өвчний үед Виферон лааг хүүхдийн эмчилгээнд хэрэглэж болох, болохгүй талаар Эрүүл мэндийн яаманд мэдээлэл хийлээ. Энэ үеэр холбогдох албаны хүмүүс юу хэлснийг хүргэж байна.

ЭМЯ-ны Төрийн захиргааны удирдлагын газрын дарга Б.Цогтбаатар: Олон улсад бүрэн судлагдаагүй лааг хэрэглэсэн

-Үр дүн нь батлагдаагүй, олон улсад бүрэн судлагдаагүй эмийн бодис лааг хавтгайруулан хэрэглэж, Эрүүл мэндийн даатгалын сангаас багагүй хэмжээний хөрөнгийг олон жилийн турш энэ лаанд зарцуулж, хөнгөлж ирсэн энэ асуудлаар албаны хүмүүсийн үгийг хүргэхээр урьж ирүүлсэн. Монгол Улсад 384 эм ханган нийлүүлэх байгууллага байна. Энэ байгууллагуудаар улсад бүртгэлтэй 5880 эм байгаагаас 67 хувь нь буюу 3939 эм импортоор оруулж ирдэг. Үүний нэг нь “Энто” компанийн оруулж ирдэг Вифеон лаа.

ЭМДЕГ-ын дарга Ч.Алтанхуяг: Эрүүл мэндийн даатгалын сангаас хөнгөлөх эмийн жагсаалтыг баталдаг

-Эрүүл мэндийн даатгалын сангаас хөнгөлөх эмийн жагсаалт гэж батлагддаг. Үүний дагуу 2016 оны гуравдугаар сарын 25-ны тухайн үеийн Нийгмийн даатгалын Үндэсний зөвлөлийн шийдвэрээр эмийн жагсаалт батлагдаж энэ жагсаалтад Виферон лаа хэлбэрээр орсон байгаа. Тухайн үед 80 хувиар хөнгөлөхөөр болсон. 2016 онд 1.9 тэрбум, 2017 онд хоёр тэрбум орчим, энэ хоёр жилд 91 мянга гаруй иргэн энэ хөнгөлөлтийг авсан. Энэ иргэдийн 50-аас дээш хувь нь хүүхдүүд байсан. Энэ оны долдугаар сарын 15-наас эхэлж Вифеоны лааны хөнгөлөлтийг бууруулсан. 2018 онд хөнгөлөх эмийн жагсаалтыг баталж гаргахдаа олон улсын жишгийн дагуу насанд хүрэгчдийн болон хүүхдийн гэсэн ангиллаар гаргасан. Үүний хүүхдийн ангилалд Виферон лааг хассан. Насанд хүрэгчдийн хувьд 20 хувиар орсон байгаа. Өнгөрсөн долдугаар сарын 15-наас хойш өнөөдрийг хүртэл 12 сая төгрөгийн хөнгөлөлтийг Эрүүл мэндийн даатгалын сангаас энэ лаанд хөнгөлөлт үзүүлсэн.

ЭМЯ-ны Эмнэлгийн тусламжийн газрын дарга М.Баттүвшин: Бид хоёр үндэсний төвийн заавар зөвлөмжид үндэслэж ажилладаг

-Эрүүл мэндийн яамнаас томуу, томуу төст өвчний үед эмчилгээний удирдамж, зааврыг боловсруулах үйл ажиллагааг хоёр үндэсний төвийн заавар зөвлөмжид үндэслэж ажилладаг. Нэгдүгээрт, ХӨСҮТ-өөс зөвлөмж, заавар авч ажилладаг. Тархвар судлалын мэргэжлийн салбар, зөвлөл болон ХӨСҮТ-өөс томуу өвчний стандартад Виферон лааг хэрэглэх заавар ороогүй байгаа талаар бидэнд албан ёсоор мэдэгдсэн байгаа. Хоёр дахь байгууллага бол ЭХЭМҮТ. Энэ төвөөс тухайн жилүүдэд томуугийн дэгдэлтийн үеийн эмчилгээний удирдамжийг баталж гаргасан. Сүүлд баталж гаргасан эмчилгээний удирдамжид Виферон бэлдмэлийг тодорхой өвчин эмгэг, зарим халдварт өвчний үед эрсдэлт бүлгийн хүмүүст эмчийн заалтаар хэрэглэж болох ч замбараагүй хэрэглэхээс зайлсхийх шаардлагатай гэсэн зөвлөгөөг өгсөн. ЭХЭМҮТ-өөс гаргасан тав дахь удаагийн зөвлөмжид Виферон лаа хэрэглэхийг зөвлөгөөгүй.

Эм биобэлдмэл, вакцины чанар аюулгүй байдлын асуудал хариуцсан мэргэжилтэн Оюунтуяа: ОХУ-даа бүртгэгдээд 12 жил болсон эм байсан байна

-Энэ эм нь 2010 оны наймдугаар сарын 25-нд Монгол Улсын эмийн бүртгэлд анх удаа бүртгүүлсэн. Тухайн үед Эрүүл мэндийн сайдын 2007 оны 38 дугаар тушаалаар батлагдсан. Эмийн улсын бүртгэлийн эмийн дүрмийг шинэчлэн батлах журмаар тавигдах шаардлагын дагуу ОХУ-д үйлдвэрлэгдсэн эм бүртгэгдсэн байгаа. Тухайн үед энэ эм нь Украйн, Беларусь, Казахстан, Узбекстан, Азербайжанд бүртгэгдсэн. ОХУ-даа бүртгэгдээд 12 жил болсон эм байсан байна. Энэ эм одоогийн байдлаар Монгол Улс ороод 12 улсад бүртгэгдэн хэрэглэж байна. 2014 оны арванхоёрдугаар сарын 19-нд Ферон үйлдвэрлэгчээс хоёрдогч болон анхдагч савлалтын загварыг өөрчлөх, олгох нөхцлийг жоргүй олгох хүсэлтээ ирүүлсэн бол Хүний эмийн зөвлөлийн хурлаар орж жоргүй олгох эмээр шийдвэрлэн хэрэглэж ирсэн байна. Бүртгэлийн хугацааг 2015 оны наймдугаар сарын 25-нд сунгуулсан. Хугацааг сунгах үед бүртгэлийн журамд тавигдах шаардлагын дагуу аюулгүй байдлын судалгааны тайланг ирүүлсэн нь архивын материалд байна. Аливаа эмийг Монгол Улсын эмийн бүртгэлд бүртгэх, зайлшгүй эмийн жагсаалтад оруулахдаа олон улсын нэрээр оруулдаг байгаа. Эрүүл мэндийн сайдын 2014 оны 215 дугаар тушаалаар Интерферон альфаг нийтийн үйлчилгээний эмийн сангаар жороор олгох гэсэн байгаа. Дараа нь энэ жагсаалт шинэчлэгдээд 2017 оны есдүгээр сарын 7-нд Интерферон альфа агуулсан бэлдмэл нийтийн үйлчилгээний эмийн сангаар жороор олгох нөхцөлтэйгөөр батлагдсан байна. Энэ оны долдугаар сарын 25-ны эм судлалын салбар, зөвлөл буюу Эрүүл мэндийн яамны дэргэдэх Хүний эмийн зөвлөл нь дороо дөрвөн салбар зөвлөл байдаг. Нэг зөвлөл нь уг эмийг баталгаажуулдаг, олгох нөхцлийг нь хянаж эмийн зар сурталчилгааг нь хянадаг. Энэ зөвлөлийн хурлаар жортой олгох шийдвэр гарсан байна. Мөн энэ талаар тус бэлдмэлийг оруулж ирдэг “Энто” компанийн Үйл ажиллагаа эрхэлсэн захирал Г.Баянмөнх, хуульч Ш.Алтангадас нар “Үндэсний мэдээллийн төв”-д мэдээлэл хийсэн юм.

“Энто” компанийн хуульч Ш.Алтангадас: 2010 оноос хойш Виферон лаатай холбоотой ямар ч гаж нөлөө илрээгүй

-“Энто” компанийн оруулж ирсэн Виферон лаатай холбоотой сөрөг үр дүн, нийгэмд үзүүлээд байгаа үр нөлөөний талаар мэдээлэл хийснийг Эрүүл мэндийн яамны албан ёсны байр суурь гэж ойлгосон. Энэ лаа 2012 онд эмийн бүртгэлд бүртгэгдээд Монголд найм дахь жилдээ худалдаалагдаж байгаа. Нөгөөтэйгүүр Оюунтуяа гэж албаны хүний мэдээлэлд 2010 онд эмийн бүртгэлд бүртгэгдсэн, үүний дараа төрийн байгууллагаас явдаг судалгаа байгаа. Энэ нь гаж нөлөөний судалгааг явуулдаг. 2010 оноос хойш Виферон лаатай холбоотой ямар ч гаж нөлөө илрээгүй. Сайдын зөрүүтэй байр суурь, зөрүүтэй мэдээллээс болж хэн хохироод байна вэ. Өнөөдөр хохирогч нь сайд, нэг компани ч биш хэрэглэгч иргэд. Хэрэглэгчид тайлбар хийхийг хүссэн мэдээллүүд ирж байна. Энэ эм чинь үнэхээр сайдын хэлсэн шиг 1-2 жилийн дотор хүүхдийн дархлааг устгадаг юм уу гэж асууж байна. Яамны байр суурь олон байдлаар өөрчлөгдөж байна. Гэхдээ өнгөрсөн пүрэв гаригийн байдлаар Сүхбаатар дүүргийн Иргэний хэргийн анхан шатны шүүх хурал болж Захиргааны хэргийн анхан шатны шүүхэд компанийн зүгээс нэхэмжлэл өгсөн байгаа. Захиргааны хэргийн шүүхэд төрийн байгууллага, албан тушаалтан буюу Эрүүл мэндийн сайдын гаргасан үйлдэл, мэдээлэл нь хууль бус болохыг тогтоолгохоор хүсэлт гаргаад явж байна.

“Энто” компанийн Үйл ажиллагаа эрхэлсэн захирал Г.Баянмөнх: Д.Сарангэрэл сайд албан ёсны залруулгаа хийх байх

-Энэ бүтээгдэхүүн нь 50 жил эрдэмтэн, судалгаа нотолгооны үндсэн дээр гарч ирж сүүлийн 20 жил эмнэлзүйн практикт хэрэглэгдээд явж байгаа. Одоо ярьж байгаа томуу, томуу төст өвчин, хүүхдэд болон жирэмсэн эх, бусад вирусын төрлийн халдварын үед хэрэглэдэг бүтээгдэхүүн юм. 2018 оны энэ сарын 1-нд 25 дугаар ТВ-гээр Эрүүл мэндийн сайд Д.Сарангэрэл тухайн бүтээгдэхүүний аюулгүй нь нотлогдоогүй гэдэг нь Азийн хөгжлийн банк болон олон улсын байгууллага, эрдэмтэд тогтоосон учраас Эрүүл мэндийн даатгалаас хасах нь битгий хэл Монгол Улсад хэрэглэж болохгүй гэдэг мэдэгдэл хийсэн. Үүний дараа энэ сарын 7-нд С1 ТВ-ээр сайд би хасах тухай ерөөсөө яриагүй гэдэг байр сууринаасаа буцсан нийтлэлийг бас хийсэн. Азийн хөгжлийн банк гэж дурдагдаж байгаа. Азийн хөгжлийн банкинд бид арваннэгдүгээр сарын 5-нд бичгээр хандсан байсан. Тус банкны суурин төлөөлөгч гадаадад томилолттой явж байгаа, тав хоногийн дараа албан ёсоор журмынхаа дагуу танай хариуг өгнө гэсэн. 10-ны өдөр өөрийнхөө фэйж хуудаст “Азийн хөгжлийн банк ямар нэгэн эмийн үр дүн, гаж нөлөө, аюулгүй байдлын талаар судалгаа, дүгнэлт хийгээгүй, хийдэггүй болно. Харин эмийн даатгалтай холбоотой эмийн үнийн судалгааг хийхэд бид санхүүжилт үзүүлсэн” гэж албан ёсны тамга, гарын үсгээ зуруулаад ирүүлсэн. Үүнийг албан ёсны байр суурь гэж үзэж болно. Тухайн үед бид Азийн хөгжлийн банкны энэ судалгааг олж үзэх гээд чадаагүй. Үүнийгээ албан бичгээр ирүүлсэн. Одоо яамны цахим хуудаст байна лээ. Бид хууль, дүрэм журмын дагуу материалаа албан ёсоор өгсөн. Тэнд тухайн бүтээгдэхүүний судлагдсан түүх, аюулгүй гэдгийг яаж нотолсон гэдэг бүх судалгааны материалууд өгөгдсөн. 2015 онд тухайн бүтээгдэхүүнийг Эрүүл мэндийн яаманд журмынх нь дагуу бүртгүүлэхэд энэ материалуудыг өгсөн. Сая энэ асуудал гарснаас хойш бид дахин энэ материалуудыг хүргүүлсэн. Сайдын мэдэгдлийн нэг зөрүүтэй зүйл нь дотоодын мэргэжилтнүүд оролцоод энэ дүгнэлтийг гаргасан байгаа гэж мэдэгдсэн. Гэтэл өнөөдөр дүгнэлт гараагүй, эрдэмтдээ цуглуулаад уулзаж байна гэж ярьсан. Өнөөдрийн энэ хэвлэлийн хуралд нэг ч эрдэмтэн оролцсонгүй. Бидэнд яагаад гэдэг асуулт үлдэж байна. Дархлал судлалын чиглэлээр энэ бүтээгдэхүүнтэй холбоотой судалгаа хийдэг эрдэмтэд байр сууриа илэрхийлсэн. Яам албан ёсны залруулгаа хийх байх гэж бодож байна. Энэ оны нэгдүгээр сард хоёр дүгнэлт гарсан байдаг. Үүнд томуу, томуу төст өвчин болон хүүхдийн эмнэлзүйн практикт энэ бэлдмэлийг хэрэглэж болно гэсэн байгаа. Тэгэхээр энэ дүгнэлтийг олж олон нийтэд нээлттэй болгоорой гэж бодож байна. ОХУ-д 20 жил эмнэлзүйд хэрэглэгдэхдээ ямар нэг гаж нөлөөний бүртгэл байхгүй гэдгийг энэ бичиг баримтаар бүрдээд ирснийг хэлье. Олон байр суурийн зөрүү байгаа. Монгол Улсын эмийн бүртгэлд зайлшгүй шаардлагатай эм буюу жортой гэж хоёр удаа бүртгэгдсэн талаар Оюунтуяа мэргэжилтэн хэлсэн байгаа. Зайлшгүй эмийн жагсаалтад байгаа бүтээгдэхүүнийг Эрүүл мэндийн даатгалын санд хөнгөлөлттэй олгоно гэсэн шийдвэрийг яам болон Эрүүл мэндийн даатгалын сан өөрөө гаргасан. Түүнээс ямар нэгэн давуу эрх олгосон зүйл байхгүй. Олон хүн хэрэглэсэн гэж байна. Хувийн компани нь, үйлдвэрлэгч нь өөрөө тайлбарлах ёстой гэж байна лээ. 2010, 2015 онд бүртгэгдэхдээ аюулгүй байдлын судалгааг хийсэн. Яамны мэргэжилтэн Оюунтуяа сая хурлаар хугацаа, гаж нөлөөний бүртгэл бүртгэгдээгүй гэдгийг албан ёсоор мэдэгдсэн гэж байлаа. Эх сурвалж www.polit.mn