С.САРУУЛ

Нийслэлийн удирдах ажилтны шуурхай зөвлөгөөн өнөөдөр болж, нийслэлийн Засаг дарга Д.Сумъяабазар удирдан зохион байгууллаа. Энэ үеэр цаг үеийн тулгамдсан асуудалтай холбоотой онцлог ажлуудыг Нийслэлийн Засаг дарга тодруулан асуув. Замын хөдөлгөөний удирдлагын төв НӨҮГ-ын дарга С.Адъяасүрэн "Замын хөдөлгөөний эрчим наймдугаар сарын 10-наас нэмэгдэж эхэлсэн. Нийслэлд орж ирж буй машины тоо хотоос гарч байгаагаас өндөр байна. Жилийн өмнө 418 мянган автомашин хөдөлгөөнд оролцож байсан бол энэ жилийн дундаж өсөлтөөс анзаарахад оргил үедээ 443 мянган автомашин хөдөлгөөнд оролцохоор байна. Тиймээс наймдугаар сарын 27, 28-наас эхлэн долоо хоногийн хугацаанд автомашинуудыг улсын дугаарын тэгш, сондгойгоор хөдөлгөөнд оруулах саналыг гаргаад байгаа. Эс тэгвээс түгжрэл өндөр байх магадлалтай юм. Хэрэв тэгш сондгойгоор зорчуулбал хөдөлгөөний эрчим 40 орчим хувиар буурна. Түүнчлэн авто замын нэгдүгээр эгнээний камеруудыг суурилуулж байна. Одоогоор 15 камер шинээр суурилуулсан бөгөөд бусдыг нь хуваарийн дагуу суурилуулж дуусгана" гэсэн юм.

Улаанбаатар хотын гудамж замд хөдөлгөөний ачаалал эрс нэмэгдэж байгаагаас 440 албан хаагч ээлжээр ажиллаж байгаа аж.

Эх сурвалж: www.polit.mn