Б.НЯМСҮРЭН

Нийслэлийн Засаг даргын захирамжийн хүрээнд 18 байршил дахь хашаа хайсыг эзэшигч иргэн, хуулийн этгээд өөрсдийн хүсэлтээр чөлөөллөө.

Энэ онд 376 байршлын 20.2 км урт хашаа хайсыг чөлөөлж, иргэд саадгүй зорчих нөхцлийг бүрдүүлэхээр төлөвлөсөн. Тус ажлын хүрээнд Баянгол дүүргийн таван байршил, Баянзүрх дүүргийн 26 байршил, Хан-Уул дүүргийн дөрвөн байршил, Чингэлтэй дүүргийн 10 байршил, Сүхбаатар дүүргийн гурван байршил зэрэг газруудын хашаа хайсыг чөлөөлсөн байна.

НИТХ-ын 2019 оны 24/17 дугаар тогтоолоор “Нийслэлийн нутаг дэвсгэрт хашаа, хайс барих, ашиглах, буулгах журам”-ыг баталсан. Уг тогтоолыг үндэслэн нийслэлийн Засаг даргын А/585 дугаар захирамж 2022 оны дөрөвдүгээр сард гарсан.

Тус захирамжаар нийслэлийн иргэд эрүүл аюулгүй орчинд амьдрах эрхийг хангах зорилтын хүрээнд газар ашиглалтыг сайжруулах,  авто замын түгжрэлийг бууруулах, явган хүний зам, ногоон байгууламж, нийтийн эзэмшлийн зам, талбайг нэмэгдүүлэх зорилгоор хууль, журам зөрчсөн, стандарт бус хашаа, хайс барьсан газруудын  зөрчлийг арилгаж, газар чөлөөлөх байршлыг баталсан юм.

Эх сурвалж:www.polit.mn