Б.ДОЛЖИНЖАВ

Туркийн эрх баригч Шударга ёс, хөгжлийн намаас (AKP) цахим орчинд худал мэдээлэл тараахыг хориглосон хуулийг ирэх сард батлахаар төлөвлөж байна. Эрх баригчдын зүгээс олон нийтэд дэлгэрэнгүй мэдээлэл өгөөгүй ч нэр бүхий хүний мэдээлснээр олон нийтийн сүлжээнд худал мэдээлэл тараахыг гэмт хэрэг гэж үзэх бөгөөд таван жил хүртэлх хугацаагаар хорих шийтгэл оноохоор зэхэж байгаа аж.

Туркийн Ерөнхийлөгч Режеп Таийп Эрдоган цахим орчны худал, ташаа мэдээллийн аюулын талаар ярьж байсан удаатай. Мөн түүний намын орлогч дарга Махир Унал “Худал мэдээлэлтэй тэмцэх нь терроризмтэй тэмцэж байгаатай агаар нэг” хэмээн мэдэгдэж хуулийн зохицуулалт хийх талаар дурсаж байв.

Тиймээс тус хуулийн төслийг олон нийтэд зарлахыг шаардаж, эсэргүүцэж байгаагаа  сэтгүүлчдийн холбооноос илэрхийлж  эхэллээ. Учир нь олон нийтийн хэвлэл мэдээллийн хэрэгслийг зохицуулах хууль батлагдсанаас нэг сарын дотор Facebook, Twitter, YouTube тэргүүтэй платформуудад 1.18 сая ам долларын торгууль ногдуулж байсныг Ройтерс агентлаг мэдээлэв.

Турк улс хэвлэлийн эрх чөлөөгүй орны жагсаалтад ордог. Сүүлийн жилүүдэд олон зуун  мэдээллийн сайтыг хаасан нь энэ үзүүлэлтийг улам унагажээ. Мөн өнгөрсөн жил гэхэд тус улс олон нийтийн сүлжээний 30 мянган хэрэглэгчийг баривчилж, 5000 хүнд ял оноожээ.

Туркийн сэтгүүлчдийн холбооны ерөнхийлөгч Олкайто “Сэтгүүл зүйн тухай олон зүйл ярих шаардлагагүй байх. Харин бид өөрсдийгөө худал мэдээллээс хамгаалах болно. Энэ нь юу гэсэн үг вэ гэвэл Засгийн газар мэдээллийн бодит байдлыг үргэлж нуудаг байдлаас өөрсдийгөө хамгаална. Хэрэв эрх баригчид бидний эсрэг хууль баталвал  үргэлжлүүлэн тэмцэнэ.Олон жилийн турш хэвлэлүүдийн 90 хувь нь Засгийн газрын дарамтад ажиллаж ирлээ. Тэд Засгийн газрыг шүүмжилсэн мэдээг худал мэдээ гэж зарлаж болзошгүй” гэв. Харин Ерөнхийлөгч Режеп Таийп Эрдоган хариуд нь АНУ-ын CBS телевизэд яриа өгөх үеэрээ “Турк бол зүйрлэшгүй их эрх чөлөөтэй орон” гэж ярьжээ.

 Эх сурвалж:Reuters