“Polit” хуанли: “Төрсөн өдөр” буландаа гуравдугаар сарын 11-нд төрсөн өдөр нь тохиож буй Японы мэргэжлийн сүмогийн 69 дэх Их аварга, Хөдөлмөрийн баатар, гавьяат тамирчин М.Даваажаргалын тухай онцолж байна.

Хакүхо Шоо  1985 оны энэ сарын 11-нд  Улаанбаатарт төржээ.  2000 онд анх сүмод очиж 2001 оноос барилдсаар 2007 оны тавдугаар сарын 30-нд тэрбээр 22 насандаа Японы мэргэжлийн сумо барилдаанд Монголоос очиж барилдаж байсан хоёр дахь, гадаадын дөрөв дэх ёкозүна болсон түүхтэй.

Түүний өндөр 192 см бөгөөд 158 кг жинтэй ажээ.Түүний аав нь Монгол Үндэсний бөхийн дархан аварга, Монгол улсын Хөдөлмөрийн баатар, гавьяат тамирчин, Олимпын мөнгөн медальт, алдарт бөх Жигжидийн Мөнхбат юм. 1000 жилийн түүхтэй Японы үндэсний сумо бөхөд 30-аас дээш түрүүлсэн хоёр аварга байдаг бол 1187 даваа авч 45 удаа түрүүлж Японы Эзэн хааны цомыг авсан цор ганц бөх нь "Хакухо" М.Даваажаргал юм.

Хакухо 2019 онд Японы иргэншил авч нэрээ Хакухо Шоо гэж сольжээ. Хакухо нь 2007 онд гурван жил үерхсэн Япон Улсын загвар өмсөгч Сайоко Вадатай гэрлэсэн бөгөөд тэд одоо дөрвөн хүүхэдтэй.

Тэрбээр мэргэжлийн сумо бөхийн дэвжээний эзэн, ояката болж ирээдүйн шилдэг сумочдыг бэлдэх ажилдаа орж ажиллаж байгаа билээ.  Танд төрсөн өдрийн мэнд хүргэе.

Эх сурвалж:www.polit.mn