О.ОЮУНБОЛД

АНУ-ын сансрын нисгэгч Шейн Кимброу, Францын сансрын нисгэгч  Томас Пескет нар зургаан цаг гаруй задгай сансарт  алхсаныхаа дараа  Олон улсын сансрын станцад буцаж ирсэн гэж “НАСА”-гаас мэдээлжээ. Тэд “ИРОСА” нарны хавтанг байрлуулахын тулд хийсэн энэ алхалт 6:28 цаг үргэлжилж Гринвинчийн цагаар 18:10 цагт дууссан байна. Харин хоёр дахь нарны хавтанг энэ сарын 25-нд байрлуулна гэж нэмж мэдээлжээ. Энэ хоёр нарны хавтанг энэ сарын эхээр ачаа тээвэрлэгч “Карго Драгон” хөлгөөр Олон улсын сансрын станц руу аваачсан байна. Энэ төрлийн нийт зургаан ширхэг нарны хавтанг нэмэлт цахилгаан эрчим хүч хуримтлуулахын тулд Олон улсын сансрын станцын гадаа байрладаг секторт байрлуулахаар төлөвлөжээ.  Харин одоогоор  ОХУ-ын сансрын нисгэгч Олег Новицки, Пётр Дубров, АНУ-ын сансрын нисгэгч Марк Ванде Хей,Шейн Кимброу,Меган Майк Артур, Японы Акихико Хошиде, Францын Томас Пескет нараас бүрдсэн 65 дэх экспедиц тойрог зам дээр ажиллаж байна.

Эх сурвалж: www.polit.mn