З.БАТЦЭЦЭГ

Орос, Америкийн дээд хэмжээний уулзалтыг эх орондоо зохион байгуулсан Швейцарийн Ерөнхийлөгч Ги Пармелен нь Владимир Путин, Жо Байден нарын уулзалтын талаар хувийн сэтгэгдлээ хуваалцлаа.

Түүнээс Швейцарийн RTS телевизийн сурвалжлагч дээд хэмжээний уулзалтын хамгийн мартагдашгүй мөчийн талаар асуухад “Жо Байден, Владимир Путин нар таван минутын турш ярилцсан. Тэдний хооронд бүх зүйл сайн байгааг би шууд мэдэрсэн” гэж хариулжээ. Мөн тэрээр Оросын Ерөнхийлөгч шулуун шударга байгаа нь таалагдсан гэсэн байна.

“Владимир Путин бол тойруулж ярьдаггүй. Түүний хэлж байгаа үг шууд зорилгодоо чиглэсэн байдаг. Би ийм чанарыг үнэлдэг” гэж тэрээр хэлжээ.  

В.Путин, Ж.Байден нарын анхны бүрэн хэмжээний уулзалт болсон. Ерөнхийлөгч нар  4,5 цаг уулзаж, зарим нэг тохиролцоонд хүрсэн. Тодруулбал, ОХУ-ын Ерөнхийлөгч стратегийн тогтвортой байдлын талаар зөвшилцлийг салбар дундын түвшинд эхлүүлэхээр шийдсэн гэж мэдэгдэв. Үүнээс гадна, талууд цөмийн дайнд ялагч байж болохгүй гэсэн зарчмыг баримтлан хамтарч ажиллахаа мэдэгдсэн.

Эх сурвалж: www.ria.ru