Т.САЙХАН

Хэнтий аймагт өчигдөр 18:55-20:50 цагийн хооронд аадар бороо орж, үер буужээ. Үүний улмаас 99 айл өрхийн гэр, хашаа /84 гэр, 15 байшин/, 13 аж ахуйн нэгж байгууллагын барилгын зоорийн давхар, есөн орон сууцны байрны зоорийн давхар, нийтийн эзэмшлийн зам талбайн 80 хувь нь усанд автсан байна.

Тус аймгийн Онцгой байдлын газрын алба хаагчид зам арчлалтын “Харгуй” ХХК-ийн ажилтнууд сэргээн босгохоор ажиллаж байна.

Үерт өртөж гэртээ амьдрах боломжгүй болсон дөрвөн айл өрхийн долоон том хүн, таван хүүхэд, нийт 12 хүнийг Хэрлэн сумын Ерөнхий боловсролын дөрөвдүгээр сургуулийн дотуур байранд түр байрлуулж байна.

Мөн тус аймгийн Ус цаг уур орчны шинжилгээний газрын зургаадугаар сарын 24-ний өдрийн 19:00 цагийн мэдээгээр зургадугаар сарын 25-ны өдрийн 01:00 цагаас эхлэн усархаг аадар бороо орохоор байсан тул ОБЕГ-ын Тэргүүн дэд дарга бөгөөд штабын дарга, бригадын генерал Г.Ариунбуянгийн шийдвэрээр хүч нэмэгдүүлэн Үндэсний аврах бригад, Багануур дүүргийн Онцгой байдлын хэлтсийн алба хаагчид зургаадугаар сарын 24-ний өдрийн 23:00 цагт явж, БНД-ийн ОБХ-ийн бүлэг 03:15 цагт, ҮАБ-ын бүлэг 05:40 цагт очжээ.

Эх сурвалж:www.polit.mn