Европарламент олон нийтийн мэдээллийн эрх чөлөөний шагналыг Жулиан Ассанжид олгожээ

Нүүр

Дэлхийн улс төр

Европарламент олон нийтийн мэдээллийн эрх чөлөөний шагналыг Жулиан Ассанжид олгожээ

2019-04-17

Нийтэлсэн: Админ

1 мин

ХУВААЛЦАХ

ЖИРГЭХ

-WikiLeaks-ыг үндэслэгчийн төлөөлөгч, Нобелийн энх тайвны 1976 оны шагналт Мейрид Корриган уг шагналыг гардаж авсан хэмээн The Sydney Morning Herald сонин мэдээлжээ-

Жулиан Ассанж

Д.ЭНХЭЭ Мальтад амь үрэгдсэн сэтгүүлч бүсгүй Дафне Карауна Галициягийн нэрэмжит Европын парламентаас олгодог олон нийтийн мэдээллийн хэрэгслийн эрх чөлөөний 2019 оны шагналыг WikiLeaks порталыг үндэслэгч Жулиан Ассанж хүртжээ. The Sydney Morning Herald сонин лхагва гарагт энэ тухай мэдээлэв. Ассанжийн төлөөлөгчийн хувиар Нобелийн энх тайвны 1976 оны шагналт Мейрид Корриган уг шагналыг гардаж авсан байна. Шагнал гардуулах ёслол Страсбургт Европарламентад болсон. Европарламент дахь Европын зүүний намуудын нэгдсэн фракцаас (GUE/NGL) Ассанжийн нэрийг энэхүү шагналд дэвшүүлжээ. WikiLeaks порталыг Ассанж 2006 онд үүсгэн байгуулсан бөгөөд Их Британи, АНУ болон бусад хэд хэдэн орны Засгийн газрын үйл ажиллагааны талаар нууц материал нийтэлсэн. Түүнийг бэлгийн хүчирхийлэл үйлдсэн хэрэгт Шведэд 2012 онд буруутгасны улмаас тэрээр Эквадороос орогнол хүсэж, Лондон дахь тус улсын Элчин сайдын яаманд долоон жил орчим амьдарсан. Өмнөд Америкийн энэ улс дөрөвдүгээр сарын 11-нээс түүнийг үргэлжлүүлэн орогнуулахаас татгалзсаны дараа 2012 оны зарлан дуудах бичгийн дагуу Лондоны шүүхэд ирээгүй шалтгаан, мөн түүнийг 2017 оноос АНУ-д шилжүүлэх хүсэлтийн дагуу Ассанжийг Элчин сайдын яамны байрнаас цагдаа нар шууд баривчилсан. Дафне Каруана Галиция Мальт арлын төрийн дээдчүүлийн авлигын гэмт хэргийг эрэн сурвалжилдаг сэтгүүлч байсан. Түүний машиныг 2017 оны аравдугаар сарын 16-нд дэлбэлэх үеэр сэтгүүлч бүсгүй амь үрэгдсэн билээ. Мальтын эрх баригчид гэм буруутныг олж шийтгэхээ амлан, мөрдөн шалгах ажиллагаанд Холбооны мөрдөх товчоог оролцохыг урьсан хэдий ч энэ гэмт хэргийн төлөө хэн ч шийтгүүлээгүй. Сэтгүүлч бүсгүйн дурсгалыг хүндэтгэж, сэтгүүлчид, хүний эрхийг хамгаалагч нарт олгодог шагналаа түүний нэрэмжит болгохоор Европарламент шийдвэрлэсэн. Энэ шагналын анхныхыг Дафне Каруана Галицияд 2018 оны аравдугаар сарын 23-нд нэхэн олгосон юм. Эх сурвалж: www.polit.mn