Г.ГАНЧИМЭГ

Орон сууцны үнэ өмнөх сарынхаас хоёр хувь, өмнөх оны мөн үеийнхээс 17.2 хувиар өсчээ. Энэхүү орон сууцны үнийн индексийг Монголбанк үл хөдлөх хөрөнгийн “Тэнхлэг зууч”, “Актив зууч”, “Монголиан Пропертис” компанитай хамтран гаргасан юм. Индексийг тооцохдоо сар бүр нийслэлд борлуулагдахаар зэх зээлд нийлүүлсэн шинэ, хуучин бүх төрлийн орон сууцны үнийг хамруулжээ.

Манай улсад Үндэсний статистикийн хороо 2009 оноос орон сууцны үнийг улирал тутам тооцож эхэлсэн байна. Уг индексээр нийслэлийн зургаан дүүргийн орон сууцыг ашиглалтад орсон оноор нь гурав ангилдаг аж. Гэхдээ энэхүү индексийн аргачлал нь зарим талаараа дутагталтай, мэдээлэл авч буй эх сурвалж нь хязгаарлагдмал байдаг. Тиймээс орон сууцны үнийн индекс тооцох аргачлалыг боловсронгуй болгож, өөрийн орны үл хөдлөх хөрөнгийн зах зээлийн онцлогийг тусгах шаардлага гарчээ. Иймээс Монголбанк 2013 оны аравдугаар сараас эхлэн орон сууцны индексийг сар бүр тооцож байхаар шийдвэрлэсэн юм.