Т.САЙХАН

Манай улсын иргэд гадаад  оронд ажиллаж амьдрах нь нэмэгдэж байгаатай холбоотойгоор залилах гэмт хэрэг жил ирэх тусам өсөх хандлагатай байна гэж ЦЕГ-аас сэрэмжлүүлэв. 

Залилах гэмт хэрэг улсын хэмжээд 2022 онд 11,839 бүртгэгдсэн нь өмнөх оны мөн үеэс 5,281 буюу 80.5 хувиар, нийслэлийн хэмжээнд 9,810 бүртгэгдсэн нь 4,570 буюу 87.2 хувиар тус тус өсжээ.

Иргэд гадаад явах зорилгоор эд хөрөнгөө барьцаанд тавих, бусдаас мөнгө зээлэх, тусламж авч "Виз найдвартай гаргана" гэсэн хуурамч зарын дагуу хэн нэгэнд ханддаг. Гэтэл "найдвартай" хэмээх амласан этгээд иргэдийн мөнгийг авч залилсаар байна.

Мөн бэлэн мөнгө авсан, өгсөн баримт үйлддэггүй, тухайн хүнээ судлалгүй "аман гэрээ" хийж их хэмжээний мөнгө залилуулсан иргэд нэмэгджээ.

Хэрэв БНСУ руу зорчих бол визийг виз мэдүүлэгч өөрийн биеэр зөвхөн визийн мэдүүлэг хүлээн авах төлөөлөн гүйцэтгэх албан ёсны 10 байгууллагаар виз мэдүүлэх боломжтой юм хэмээн ЦЕГ мэдээлэв.

Эх сурвалж:www.polit.mn