З.БАТЦЭЦЭГ
Тайландын гүнж Сириваннаваригийн хувийн амьдрал, түүний амжилт ер бусын бөгөөд маргаантай байдаг. Тэрээр өөрийн хувцасны брэндийг бий болгож, "Дэлхийн мисс"-ийн оролцогчдод зориулж даашинз оёж, Пьер Балмэний урилгаар өөрийн цуглуулгаа Парисын загварын долоо хоногт танилцуулсан. Гэсэн хэдий ч хааны өв залгамжлагчийн авъяас чадвар нь ард иргэдэд тийм ч их сэтгэгдэл төрүүлээгүй: түүний брэндийг сурталчлахад улсын төсвөөс олон сая бат зарцуулагдсаныг мэдээд Тайландчууд эсэргүүцлийн жагсаал зохион байгуулжээ. Ээжээсээ, цол хэргэмээсээ салсан гүнж хэрхэн дэлхийн загварын дүр төрх болж, спортын өндөр амжилтад хүрсэн тухай лента.ру өгүүлж байна.
“Янзага шиг нүдтэй”, “хааны гэр бүлийн залуухан гишүүн”, “өв залгамжлах эрхээ хасуулсан” гэх мэтээр Тайландын 35 настай гүнж Сириваннавари Нариратанад олон нэр бий. Охины аав, Тайландын хаан Рама X (Маха Вачиралонгкорн) бас олон хочтой. Дээрэмчин, замбараагүй, хүүхэмсэг зэрэгээр хэвлэлийхэн түүнийг хочилдог.
Сириваннавари 1987 оны 1-р сарын 8-нд тэр үеийн хаан ширээг залгамжлах ханхүү болон түүний нууц амраг Ювадхида Сурацавади хэмээх нэртэй жүжигчин хоёрын харилцаанаас төрсөн. Ювадхида хайртдаа таван хүүхэд төрүүлсний дараа 1994 онд эцэст нь түүний хууль ёсны эхнэр болжээ. Гэвч гэр бүлийн аз жаргал удаан үргэлжилсэнгүй: хоёр жилийн дараа хаан ширээг залгамжлагч эхнэрээ урвасан гэж буруутгав.
Ирээдүйн хааны уур хилэн маш их хүрч, тэрээр эхнэр, дөрвөн хүү, охиныхоо хааны цолыг хасч, дипломат паспортыг нь хураажээ. Эхнэр нь хүүхдүүдээ аван Англи руу зугтсан ч, ханхүү түүнээс хамгийн хайртай зүйл болох охиныг нь авахаар шийдсэн байна. Тэрээр хатан хаан II Елизаветад хандан охиныг эх оронд нь буцаахад хувь нэмрээ оруулахыг хүссэн байна.
Охиноосоо салсны дараа ханхүүгийн эхнэр хөвгүүдийнхээ хамт АНУ-ыг зорьжээ. Сириваннаваригийн өвөө хаан Пумибол Адульядетийн зарлигаар 2005 оны 6-р сарын 15-нд түүнийг гүнж цолоор эргүүлэн авч, улмаар тэрээр хамгийн авъяаслаг гүнж гэдгээрээ алдаршжээ.
Охин өсч томрох явцад түүний нүдний өмнө эсрэг тэсрэг хоёр тод жишээ байв. Эхнийх нь түүний эмээ хатан хаан Сирикит бөгөөд түүнийг хожим жинхэнэ загварын бэлгэ тэмдэг гэж нэрлэх болно. Эцгийнхээ улс төрийн карьерын ачаар ирээдүйн хатан тэрээр Тайланд, Англи, Дани, Франц зэрэг хэд хэдэн оронд хүмүүжсэн. Ази, Европын соёл түүний хувцаслалтанд тусгагдсан. Үүнийг Францын алдарт загвар зохион бүтээгч Пьер Балмен "хатдын кутюрье" хочтой болгосон байна. Сирикит Бангкокийн нэхмэлийн музейг нээж, уламжлалт хэв маягийн найман костюм урлахад хяналт тавьж, 1960 онд дэлхийн хамгийн загварлаг хүмүүсийн жагсаалтад багтжаж байжээ.
Хоёрдахь жишээ бол загварын туршилтаараа алдартай болсон аав нь юм. Рама Х доогуур суулттай жинсэн өмд, шивээстэй биеэ ил гаргасан цамц өмсөж, өөр улс орон руу дэлгүүр хэсэх гэж явдаг нэгэн юм.
Сириваннаваригийн хувцаслалтад түүний аав, эмээ хоёрын нөлөөг ажиглаж болно. Тэрээр уламжлалт хувцасыг өдөөн хатгасан хувцастай хослуулдаг. Жишээлбэлс2022 оны 7-р сард Парисын загварын долоо хоногт гүнж цээж нүцгэн эффекттэй Schiaparelli брэндийн даашинзтай гэрэл зурагчдын өмнө гарч ирэв. Хөхөн дээрээ алтадсан гуулиар чимэглэсэн энэ хувцас нь 4800 фунт стерлинг үнэтэй юм.
Загварын ертөнц гүнжийн сонирхолыг маш их татаж, тэр үүнийг өөрийн мэргэжил болгосон. Тэрээр Бангкок дахь Хаан Чулалонгкорн их сургуульд хэрэглээний урлагийн чиглэлээр бакалаврын зэрэг авч, улмаар Францад үргэлжлүүлэн суралцсан. Хааны өв залгамжлагчийн сонголт нь нэр хүндтэй байгууллага болох Парисын загварын сургууль Ecole de la Chambre Syndicale de la Couture Parisienne дээр буув. Нэгэн цагт энд Ив Сен Лоран, Карл Лагерфельд, Валентино Гаравани зэрэг алдартай загвар зохион бүтээгчид сурч байсан.
Загварын ертөнцийн хамгийн баян гүнж
Сириваннаваригийн анхны загвар зохион бүтээл нь 2004 онд Миланы загварын долоо хоногт болсон. Гурван жилийн дараа загвар зохион бүтээгч Пьер Балмайн 20 настай оюутан охиныг Парисын загварын долоо хоногт цуглуулгаа танилцуулахаар урьжээ. Үүний дараа тэрээр өөрийн нэрийн Siriwanwari брэнд дээр нягт ажиллаж эхэлсэн бөгөөд түүний дэлгүүрүүд Бангкокийн элит бүсэд байдаг.
Хатан хаан Сирикитийн нэгэн адил тэрэр барууны хэв маягийн элементүүдийг дорнын хэв маягтай хослуулсан бөгөөд туршилтаас айдаггүй. Анхны цуглуулгын хүрээнд эмээгийнхээ дурсамжинд тулгуурлан Тайландын уламжлалт хувцсыг шинэчлэхийг оролдсон. Хувцас урлахдаа алт, мөнгөн утас, үнэт чулуун хатгамал, торгон даавууг ашигласан байна. Гэхдээ энэ нь ч Сириваннаварид хангалтгүй байсан бөгөөд тэрээр эртний Тайландын урлагт хүндэтгэл үзүүлж, цахилдаг цохын далавчийг гоёлын цүнхэн дээр наажээ.
Үүнээс гадна Сириваннавари загварын шоунд тогтмол оролцдог болсон. Шанель, Кристиан Диор, Эли Сааб гээд олон алдартай брэндүүдийн тайзан дээр түүнийг урд эгнээнд сууж байхыг харж болно. Өөрийх нь хувцаслалт ч гэсэн олны анхаарлыг татах болов. Тайландын хэвлэл мэдээллийнхэн Сириваннавариг загварын бэлгэ тэмдэг гэж нэрлэсэн бөгөөд түүний зураг Vogue, L'Officiel, Elle, Tatler зэрэг сэтгүүлүүдийн нүүрийг чимжээ.
Барууны хэвлэлүүд ч түүнийг онцолсон байдаг. Daily Mail түүнийг загварын бэлгэ тэмдэг гэж нэрлэсэн бөгөөд түүний хувцаслалтыг өөгүй гэжээ. "People" сэтгүүл гүнжийг зөвхөн гайхалтай хувцас өмсөөд зогсохгүй бас бүтээдэг гэж дурссан байна. Сириваннавари өөрийн загварын эзэнт гүрнийг байгуулснаар дэлхийн хааны гэр бүлийн хамгийн баян гишүүдийн нэг болжээ.
Ард түмний уур хилэн
Гэсэн хэдий ч зарим нь энэ бишрэлийг хуваалцдаггүй. Шүүмжлэгчид түүнийг ааваасаа загварын ертөнц, нохойнд хайртайгаас өөр зүйлийг дуурайгаагүй гэдэг. Дашрамд хэлэхэд тэр хамгийн сүүлд арван нэгэн нохойтой байсан: Йоркшир терьерийн найм, голден ретривер, лабрадор, сибирийн хаски.
"Miss Universe 2018" тэмцээнд аравдугаар байр эзэлсэн Тайландын оролцогч Софида Канчанаринд зориулж хувцас хийж дуулианы эзэн болсон. YouTube-ийн алдартай блогчин Ванчалеом Жамнеанпол түүнийг загасны хайрс, тогос шувууны өд, хийсвэр чимэглэлээр чимэглэсэн Тайландын торгон даавуугаар хийсэн, нарийхан цэнхэр даашинзыг муухай гэж нэрлэжээ. Гэсэн хэдий ч Тайландын хууль тогтоомж маш хатуу тул хааны гэр бүлийн гишүүдтэй холбоотой ийм мэдэгдэл нь 3-15 жилийн хорих ялаар заналхийлдэг. Блогчин уучлалт гуйж, дахин мэдээгээр гархаа больсон юм. 2020 онд гүнж намар-өвлийн коллекцоо үзүүлэх гэж байсан тэр өдөр Бангкок хотын иргэд эсэргүүцлийн жагсаал зохион байгуулжээ. Тэд "Ардын загварын тайз" нэртэй элэглэлийн жагсаал хийж, гүнжийн брэндэд сэтгэл дундуур байгаагаа илэрхийлжээ.
Тус брэндийн бүтээгдэхүүнийг гадаадад сурталчлахад зориулж улсын төсвөөс 13 сая бат төсөвлөсөн гэж жагсагчид эгдүүцсэн байна. Жагсаалын үеэр залуучуудын дунд алдартай эсэргүүцлийн бэлгэдэл болох гурван хуруугаа өргөсөн гарыг дүрсэлсэн зурагт хуудаснууд байрлуулсан байв. Гараа алтан шувууны торонд байрлуулсан бөгөөд дээр нь хааны сэнтийд дарагдсан улсын үндсэн хууль байв. Хоригдох аюул заналхийлж байсан ч иргэд хаант засаглалыг шинэчлэх тухай асуудлыг тавьсан. Жагсаалыг баривчилгаа дагалдаж, хүссэн үр дүнд хүрээгүй ч, улс орны улс төрийн байдал тогтворгүй хэвээр байна.
Сириваннавари хариуд нь түүний нэрний эхний үсэг болох S үсгийн арван эгнээгээр чимэглэсэн шинэ хувцас барив. Аравын тоо нь охины эцэг, хаан Рама X-ийг бэлгэддэг. Үүний зэрэгцээ хээнд зүрх хийсэн нь гүнжийн ард түмэндээ "мөнхийн хайр"-ыг бэлэгджээ. Ард түмэн ийм сурталчилгаанд дургүй байсан бөгөөд гоёл чимэглэлийг "гүнжийн дэгээ" гэж нэрлэжээ. Гэхдээ ийм гоёл чимэглэлтэй хувцаснууд тус улсын хамгийн алслагдсан мужуудад хүртэл хүрчээ.
2021 онд Сириваннавари Тайландын Vogue сэтгүүлд өгсөн ярилцлагад бас дуулиан үүсгэсэн: ярианы үеэр коронавирусын тахал орон нутгийн загварын салбарт хэрхэн нөлөөлж байна вэ гэсэн асуулт гарч ирэв. Гүнж цар тахлын үе нь түүний бизнест бас хэцүү байсан гэж хэлсэн ч уншигчдын өрөвдөх сэтгэлийг төрүүлсэнгүй. Тайландчууд түүнийг хатуу гэж буруутгаж, олон нийтийн сүлжээн дээр #НададчБасХэцүүБайсан вирусын хэштег үүсгэжээ. Учир нь тэр үеийн хааны гэр бүлийн байдал 40 тэрбумаар доллараар үнэлэгдэж, дэлхийн хамгийн баян хаант засаглалын нэг болгосон.
Гүнжийн спорт ба хувийн амьдрал
Гэсэн хэдий ч эрх танхил дүр төрх нь түүний спортод амжилт гаргахад тусалсан хүчтэй хүсэл зориг, тэсвэр хатуужилтай нийцэхгүй байгаа юм. Гүнж бадминтоныг мэргэжлийн түвшинд тоглож, 2005 онд Зүүн өмнөд Азийн наадамд багийнхаа хамтаар алтан медаль хүртэж байжээ. 2016 онд Тайландад нэгэн тэмцээн зохион байгуулагдаж, Сириваннавари гүнжийн нэрэмжит Тайландын Мастерс нэрэмжит болсон.
Үүнээс гадна арван настайдаа хааны охины амьдралд морин спорт гарч ирэв. Тэрээр уяа сойлго, уралдаан, үсрэлт гэсэн гурван өөр төрлийг эзэмшээд зогсохгүй морь унахад маш их дурласан тул бэртсэн ч гэсэн бэлтгэлээ хийсээр байв. Тэрээр 2013 оны Зүүн өмнөд Азийн наадамд Тайландын шигшээ багийн бүрэлдэхүүнд эх орноо төлөөлөн оролцож, 2019 онд түүний баг Азийн аварга шалгаруулах тэмцээнд анх удаа түрүүлсэн.
“Би долоо хоногийн зургаан өдөр бэлтгэл хийж, гурван морьдоо нэг нэг цаг унадаг. Би гэмтэл авсан: хөлөө хугалж, зүүн хөлөндөө шураг суулгасан. Гэсэн хэдий ч би хэзээ ч бууж өгөөгүй. Би зорилгодоо хүрэхийн тулд чадах бүхнээ хийдэг“ гэжээ.
Гүнжийн хувийн амьдралын зарим нарийн ширийн зүйлс спорт, загвартай холбоотой байдаг. Тиймээс 2016 онд Францын нээлттэй теннисний аварга шалгаруулах тэмцээнд нэгэн нууцлаг залуугийн хамт олны анхаарлыг татав. Хоёр жилийн дараа тэр яг энэ арга хэмжээнд дахин түүнтэй гарч ирсэн. Дараа нь түүнийг уралдаанд, мөн Louis Vuitton брэндийн шоун дээр нөгөө л туранхай загварлаг бор үстэй залуу дагалдан явах болов.
Гүнжийн нууцлаг хамтрагч нь Францын бизнес эрхлэгч, Boll & Rava, ACE Denim хувцасны брэндүүдийн хамтран эзэмшигч Гийом Рава гэсэн батлагдаагүй мэдээлэл аажмаар хэвлэл мэдээллийн хэрэгслээр цацагдав. Энэ дэлгүүр нь Сириваннаваригийн эх нутагт буюу Бангкокийн үзмэрүүдийн нэг гэж тооцогддог 78 давхар тэнгэр баганадсан барилгад нээгдсэн анхны дэлгүүр байсан нь анхаарал татаж байна.
Тайландын гүнж энгийн иргэнтэй гэрлэвэл гэр бүлийн дэмжлэг, байр сууриа алдаж магадгүй гэж ярьдаг. Гэвч хааны бага охин ийм хэтийн төлөвөөс айдаггүй бололтой. Гэсэн хэдий ч тэр хэзээ ч өөрийн мэдрэмжээ олон нийтэд дэлгэдэггүй.
Эх сурвалж: www.polit.mn