“Тавантолгойн Ухаахудагийг “Энержи ресурс” авсан нь хууль зөрчсөн” гэх дүгнэлтийг Засгийн газрын ажлын хэсэг гаргасан.
Мөн УИХ-ын гишүүн, ЗТАЖ-ын сайд, Дэд бүтцийн яамны Төрийн нарийн бичгийн дарга, БОАЖЯ-ны Төрийн нарийн бичгийн даргаар ажиллаж байсан Ц.Цэнгэлийг тухайн үед “Энержи ресурс” компанийн хувьцаанд хамааралтай байж, хувиа“Дархан-Сэлэнгийн ЦТС” ХК-ийн хувьчлалаар солиод гарсан гэдэг.
Тэрээр УИХ-ын гишүүн байхдаа 2010 оны хаврын ээлжит чуулганы зургадугаар сарын 10-ны өдрийн хуралдаанаар "Тавантолгойн нүүрсний ордыг ашиглах зарим асуудлын тухай" УИХ-ын тогтоолын төслийг хэлэлцэх үеэр “Тавантолгойн энэ асуудал үнэхээрийн том асуудал. Энэ бол түүхэн үйл явдал болж байгаа юм. Энэ Тавантолгой чинь намайг 2002 онд Төрийн нарийн бичгийн дарга байхад жижигхэн англи хэл дээр брошюр байсан. Гадаад, дотоодод явуулаад аваачиж өгөөд байдаг, хэн ч тоодоггүй байсан. Урьд нь Австралийн гэлүү, Канадын нэг компани эзэмшиж байгаад төлбөрөө төлөөгүй цуцлагдсан юм гэнэ билээ. Тэгээд харин “Энержи ресурс” компани найман жил ард түмэндээ өнөөдөр бид нарыг ийм ярих боломжийг олгоод Тавантолгой гэсэн 100 хувь Монголын өмчийг ярьж байна. Үүнийг өдийг хүртэл авч явж, Монголдоо үлдээсэн Ерөнхий сайд танд баярламаар байна.
Хоёрдугаарт, бид нар тамын тогооны үлгэр шиг бие биеэ жаахан юм хийгээд аваад үлдсэн юмыг баярлахын оронд ямар нэгэн сөрөг асуудал тавьдгаа болимоор байна. Энержи ресурсын авч үлдсэн гавьяа өнөөдөр бид нар энэ ярих боломж олгож байгаа юм. Хэрэв үүнийг тухайн үед эднийх аваагүй, өөр компани аваад үлдсэн бол яахав. Бас л Оюу толгой шиг юм яриад бид нар нөгөө тал нь хөрөнгөө оруулсан гэсэн янз бүрийн юм яриад сууж байгаа шүү дээ. Үүнийг зөв талаас нь манай гишүүд ойлгох байх гэж бодож байна” гэж байв.