Б.НЯМСҮРЭН

ОХУ-ын тэргүүлэх 20 их, дээд сургуулийн төлөөлөгчид Монгол Улсын нийслэл Улаанбаатар хотод болох “ОРОСЫН ҮНДЭСНИЙ БОЛОВСРОЛЫН VII ҮЗЭСГЭЛЭН-2022”-д оролцлоо.  Улаанбаатар дахь Русский Дом тус үзэсгэлэнгийн зохион байгуулагчаар ажиллаж байгаа бөгөөд үзэсгэлэн өнөөдөр эхэллээ. Монгол дахь үзэсгэлэнгийн зочдод зориулан боловсролын байгууллага бүр өөр өөрийн өвөрмөц танилцуулгыг бэлтгэсэн байна. Тухайлбал, өнөөдөр Томскийн Политехникийн Их Сургууль (ТПУ) ахлах ангийн сурагчдын дунд хичээлийн олимпиад зохион байгуулах юм.Тус олимпиадын дүнгээс хамаарч тус их сургууль гурван мэргэжлээр тэтгэлгээр сургах сурагчийг сонгох юм. Үүнд, технологийн процесс, үйлдвэрлэлийн автоматжуулалт; газрын тос байгалийн хийн бизнес; цахилгаан эрчим хүчний үйлдвэрлэл, цахилгаан инженерчлэл гэсэн мэргэжлүүд багтана. Монгол Улсын алслагдсан аймгуудад амьдарч буй сургуулийн төгсөгчдийн дунд энэ  сарын сүүлчээр тус их сургуулиас онлайн олимпиад зохион байгуулахаар төлөвлөжээ. Россотрудничество агентлагийн Монгол дахь төлөөлөгчийн газрын даргын үүргийг түр орлон гүйцэтгэгч Валерия Кильпякова: “Жилд Монголын ЕБС-ийн 600 гаруй төгсөгч хүүхдүүд ОХУ-ын Засгийн газрын тэтгэлгээр ОХУ-д суралцдаг бөгөөд эдгээр нь зөвхөн үнэ төлбөргүй суралцах эрх авсан оюутнууд юм. Мөн төлбөртэй суралцах залуусын тоо Монголд жилээс жилд нэмэгдэж байна. Энэхүү үзэсгэлэн нь залуучуудад мэргэжил сонгоход туслах, Оросын их дээд сургуулиуд төдийгүй тухайн   улсын хотуудтай танилцах сайхан боломж болно” гэв.

Эх сурвалж: www.polit.mn