Б.ДАРЬСҮРЭН

Монголбанкнаас өгсөн мэдээллээр Монгол Улсын гадаад валютын нөөц 2.8 тэрбум ам.долларт хүрч өсжээ. Тодруулбал, өнгөрсөн сарын эцэст валютын нөөц 2.794.6 сая ам.доллар байгаа нь өмнөх сараас 3.7 хувиар өссөн үзүүлэлт аж. Оны эхний найман сард нүүрсний экспорт саатан ам.долларын орох урсгал багасаж, валютын нөөц тасралтгүй буураад байсан. Харин өнгөрсөн сард дөрвөн сая тоннд хүрсэн нь өмнөх саруудад байсан хэмжээнээс хоёр дахин өссөн үзүүлэлт болжээ.

Есдүгээр сард ам.долларын урсгалууд ингэж орж иржээ. Тухайлбал, Азийн хөгжлийн банкнаас Монгол Улсын Засгийн газарт 100 сая ам.долларын санхүүжилт олгосон. Төвбанк 2.4 тонн үнэт металл худалдан авч, оны эхнээс өссөн дүнгээр 15 тонн үнэт металл худалдан авчээ. Энэ нь өмнөх оны мөн үетэй харьцуулбал нэг хувиар өссөн үзүүлэлт юм. Мөн экспортын орлоготой ААН-үүдийн Монголбанкинд худалдсан валютын дүн оны эхний найман сарын дунджаас 100 сая орчим ам.доллараар өссөн. Тэр дундаа нүүрсний экспортоос олох гадаад валютын сарын орлого 2021-2022 оны дээд хэмжээнд хүрснийг Төвбанк мэдээлэв.

Эх сурвалж: www.polit.mn