Б.ДАРЬСҮРЭН

"Таван толгой түлш" ХХК-ийн зүүн бүсийн үйлдвэрт нүүрс буулгах зориулалт бүхий өндөрлөсөн тавцантай 320 метр төмөр замыг барьж дуусгалаа. 

Засгийн газрын тогтоолоор сайжруулсан шахмал түлшний түүхий эдийг авто замаар бус төмөр замаар татан авах шийдвэрийг гаргасан. Тогтоолын хүрээнд зүүн бүсийн үйлдвэрт төмөр зам барих ажлыг энэ оны долдугаар сараас эхлүүлсэн. Энэ төмөр замыг ашиглалтад оруулснаар сайжруулсан түлшний түүхий эдийг авто замаар тээвэрлэхгүй гэсэн үг. Ингэснээр авто зам дагасан осол аваар буурч замын эвдрэл гэмтэл гарах нь буурна гэдгийг Худалдан авах ажиллагааны албаны дарга Б.Лхагвасүрэн хэллээ.

Төмөр зам барих ажлыг хоёр багцад хувааж буй. Эхний багц ажил болох өндөрлөсөн тавцан бүхий төмөр зам ийнхүү ашиглалтад орж байгаа юм. Хоёрдугаар багц ажлын хүрээнд дөрвөн км бүхий гаалийн терминал, сайжруулсан шахмал түлшний түүхий эд буулгах талбай зэргийг барьж байгуулах аж. Энэ ажлыг ирэх аравдугаар сарын 30-н гэхэд ашиглалтад оруулахаар ажиллаж байна гэдгийг албаныхан хэллээ.
Зам барих энэхүү ажлыг "Улаанбаатар төмөр зам" ХНН болон "Талын төмөр зам" ХХК хамтран гүйцэтгэж байгаа юм.

Эх сурвалж: www.polit.mn