Т.САЙХАН

Нийслэлийн Засаг дарга асан Э.Бат-Үүлд холбогдох хэргийн шүүх хурал удаа дараа хойшлогдож байна.  Үүнтэй холбоотойгоор АН-ын гишүүн Э.Бат-Үүл өнөөдөр /02.04/ мэдээлэл хийлээ.  Тэрээр "Намайг шүүх хурал хойшлогдсонтой холбоотойгоор зарим мэдээллийн хэрэгслээр гүжир гүтгэлэг агуулгатай мэдээллийг тараах боллоо. Тухайлбал, нэр бүхий мэдээллийн хэрэгслээр шүүх хуралд улсын яллагчаар оролцож буй прокурор н.Золзаяагийн хэлсэн "Шүүх хурал хойшилж байгаа нь хардлага төрүүлж байна" гэснийг үндэслэн, Э.Бат-Үүлд холбогдох хэргийн шүүх хурал 12 удаа хойшилж байгаа нь МАН-ын 100 жилийн ойн өршөөлд хамрагдах гэж байгаа санаатай үйлдэл мэт олон түмэнд буруу ташаа ойлголт төрүүлэх мэдээллийг гаргаж, цахим орчинд түгээж байна. Шүүгдэгч бид аль болох цаг алдалгүй шударга ёс тогтоохыг хүсэн, хэрэг хянан шийдвэрлэх явцад саад учруулаагүй. Одоо ч шүүх хурлыг хурдан хийлгэх хүсэлтэй байгаа" гэлээ. 

 Мөн "Ерөнхийлөгчийн сонгууль гэх мэт улс төрийн үйл явц дөхөх бүрийд намайг элдэв хэрэгт холбогдуулан 30 жилийн турш гүтгэн гүжирдэж ирсэн. Энэ байдал одоо ч үргэлжилж байна. Би монголчуудын эрх чөлөөний төлөө тэмцсэнээс өөр гэм хийгээгүй. Миний бие прокурор н.Золзаяаг шүүхэд өгөх болно. Би шударга шүүхээр шүүлгэх эрхээ эдлэхийг хүсч байна" гэсэн юм.

Эх сурвалж:www.polit.mn