К.АНУ
АНУ-д болсон хар салхины улмаас 31 хүн амиа алдсан тухай ВВС агентлаг холбогдох албаны эх сурвалжуудад үндэслэн мэдээлсэн байна.
Баасан гарагт шуурга баруун дунд болон зүүн өмнөд хэсгээр дайрч, эрх баригчид хэд хэдэн мужид онц байдал зарласан байна.
Хамгийн их хохирол амссан муж нь Миссури бөгөөд 12 хүн нас баржээ. Канзас мужид хүчтэй шороон шуурганы улмаас олон тооны осол болж, найман хүн амиа алджээ. Арканзас мужид гурван хүн амиа алдаж, 32 хүн бэртэж гэмтсэн байна. Миссисипи мужийн эрх баригчид дөрвөн хүн, Техаст гурав, Оклахома мужид нэг хүн ослоор нас барсан гэж мэдээлжээ.
Тус улсын Үндэсний цаг уурын албаны цаг агаарын урьдчилсан мэдээний төвөөс мэдээлснээр одоо хамгийн том аюул өмнөд мужуудад заналхийлж байна. Ойрын цагуудад хар салхи баруун Флорида, Жоржиа мужид хүрэх төлөвтэй байна. Цаг уурчид хар салхины идэвхжил буурч байгаа ч зарим мужуудад аюултай хэвээр байна гэж сэрэмжлүүлжээ.
Эх сурвалж: polit.mn