П.АМГАЛАН

ОБЕГ-ын Шуурхай штабаас Дундговь аймгийн Онцгой комиссын гишүүдтэй цахим хурал хийж, өвөлжилтийн нөхцөл байдлын мэдээлэлтэй танилцав. Тодруулбал, Дундговь аймгийн хэмжээнд нийт нутгийн 48 орчим хувьд их, 42 хувьд нь дунд зэрэг эрсдэлтэй байгаа бол 10 хувьд бага эрсдэлтэй гарсан байна. Харин сумын дүнгээр  авч үзвэл Өлзийт, Хулд, Өндөршил, Эрдэнэдалай  зүүн тал, Луусын хойд тал, Сайнцагааны урд талын нутгаар нэн их эрсдэлтэй гэж дүгнэжээ. Өнгөрсөн арваннэгдүгээр  сард ихэнх нутгийг  хамарч 4-9 хоног олон жилийн дунджаас ахиу цас орж, цасан шуурга шуурсан нь зам даваа хаагдах,  бэлчээрийн өвс ургамал цасанд дарагдах, улмаар мал бэлчих боломжгүйд хүрсэн байна.  Мөн Булган, Говь-Сүмбэр, Дорноговь, Дорнод, Өмнөговь, Төв, Сүхбаатар, Хэнтий аймгуудад 93 өрхийн 52865 толгой мал оторлож байгаа бол өөрийн аймаг дотор 105 өрхийн 62895 толгой мал оторлож байгааг ОБЕГ-аас мэдээллээ.

Эх сурвалж:www.polit.mn