Д.НАДМИД

Ховд аймгийн Дарви суманд "Буман хонь-2022" өв соёлын бэсрэг наадам боллоо. Уг наадмаар уртын дууны уралдаан, бөхийн барилдаан болж цайны соёлтой холбоотой зан үйлийг оролцогчдод үзүүлсэн байна.

Дарви сум хонин сүргийн өлгий нутаг гэдэг. Энэ сумын үе үеийн мал аж ахуйн мэргэжилтэн, малчдын хамтын ажиллагаагаар бий болгосон "Сутай" үүлдрийн хонины ашиг шим асар их. Тиймээс хоньчин хөдөлмөрийн баатруудынхаа нэрэмжит "Мал маллах сайхан" нэртэй өв соёлын танин мэдэхүйн уралдаан жил бүр зохион байгуулдаг болжээ.

Энэ удаагийн бэсрэг наадмаар нутгийн цайны бүтээгдэхүүнийг бий болгосон Г.Сайнбилэг толгой шийртэй халх цайгаар зочдоо дайлж "Баялаг сутай" шинэ цай бүтээсэн Г.Алтанцэцэг бүтээгдэхүүний дээжээ түмэнд түгээлээ. Мөн энд болсон олон арга хэмжээний нэг нь Ховд аймгийн музейн нүүдлийн үзэсгэлэн байсан юм.

Эх сурвалж:www.polit.mn