“Polit” хуанли: “Төрсөн өдөр” буландаа хоёрдугаар сарын 14-нд төрсөн өдөр  нь тохиож буй  Улсын харцага  М.Батжаргалыг онцолж байна.

Мишкагийн Батжаргал нь Архангай аймгийн Булган сумын харьяат. Үндэсний бөхийн улсын харцага цолтой бөх.  Тэрбээр Ардын хувьсгалын 85 жилийн ойн баяр наадамд улсын начин Б.Сайнбаяраар дөрөв, улсын харцага Э.Батбаатараар тав, улсын гарьд Б.Гантогтохоор зургаа давж шөвгөрөн " Монгол Улсын харцага цолыг хүртсэн байдаг. М.Батжаргалын аав нь Булган сумандаа долоо, гадны сумдад хоёр түрүүлсэн сумын начин цолтой бөх. Мөн М.Батжаргалын аав С.Мишкагийн өвөө нь улсын гарьд Д.Рагчаагийн өвөөтэй ах дүү, ээж нь улсын арслан Р.Пүрэвдагвын эмээтэй эгч, дүүсийн хүүхдүүд юм. Улсын харцага М.Батжаргалын төрсөн ах нар нь сумын заан цолтой М.Буянтогтох, М.Баттогтох нар бол төрсөн дүү нь улсын начин М.Бат-Отгон юм. Ийнхүү тэрбээр бөхийн удмыг үргэлжлүүлсэн билээ.

Мөн улс төрд зүтгэж эхэлсэн нь саяхан.  2012 оны орон нутгийн сонгуулиар Ардчилсан намынхаа  менежерээр ажиллаж гурван сонгуульд дараалан ялагдсан байсан “хар цуврал”-ыг Архангайд зогсоож АН ялж байлаа.  Үүний дараа 2012-2016 онд аймгийн Засаг даргын орлогчоор дөрвөн жил ажилласан. 2016 онд АН-ын шинэчлэлийн хүрээнд бүх шатны намын даргаа нийт гишүүдээсээ сонгодог зарчимд шилжсэн. Энэ дагуу 8000 гишүүн санал хураалтад оролцоход 6800 хүний дэмжлэгтэйгээр буюу орон даяар хамгийн өндөр хувиар дунд шатны намын даргаар сонгогдож байсан юм.  Мөн тэрбээр саяхныг хүртэл  Архангай аймгийн Засаг даргаар дэвшин ажиллаж байв.  Тэрбээр “Манай өвөө 1990 оноос хойш ардчиллыг дэмжиж ирсэн. Аав ардчиллын анхны партизануудын нэг. Манайх гэр бүлээрээ ардчиллын төлөөх үйл хэрэгт зүтгэж ирсэн түүхтэй” гэдгийг тодотгож байв.

Ийнхүү Архангайд ардчиллыг түүчээлж буй танд төрсөн өдрийн мэнд хүргэе.

Эх сурвалж:www.polit.mn