Б.Нандин

Ерөнхийлөгч Юн Сог Ёлын хэрэгжүүлж буй бодлогыг эсэргүүцсэн БНСУ-ын Үйлдвэрчний эвлэлийн холбоо хэвлэлийн бага хурал хийж, ажил хаялт зарлахаа мэдэгджээ. Тэд хөдөлмөрийн хөлсний доод хэмжээг өсгөх, цаашлаад Засгийн газрыг огцрохыг шаардаж буй юм. Мөн эрх баригчдын зүгээс хөдөлмөрийн салбарт хэрэгжүүлж буй бодлогыг "баян гэр бүлийг дэмжсэн, хөдөлмөр эрхлэлтийн эсрэг" хэмээн шүүмжилжээ.

Тус холбоо нь 1,2 сая гишүүнтэй бөгөөд ойролцоогоор 400 мянга гаруй ажилтан энэхүү ажил хаялтад нэгдэх аж. Ингэхдээ салбар бүрийн төлөөллийг хуваарьтайгаар ажил хаяна хэмээн мэдэгджээ. Тухайлбал, эмнэлгийн ажилтнууд ирэх сарын 13-нд, шуудан харилцаа холбооны салбарынхан даваа гаригт ажил хаях юм байна. Үйлдвэрчний эвлэлээс ажил хаялтыг энэ сарын 15-ныг хүртэл үргэлжилнэ гэж мэдэгдсэн ч Засгийн газрыг огцрохыг шаардаж буй шаардлагадаа хариу авах, харилцан тохиролцох хүртэл байр сууриа өөрчлөхгүй гэжээ.