Шинэ аваргатай, мэргэнтэй монгол наадам өндөрлөв

2019-07-13

 

Д.Цэрэннадмид

Тулгар төрийн 2228, Их Монгол улсын 813, Ардын хувьсгалын 98 жилийн ой, Үндэсний их баяр наадам гурван өдөр үргэлжилж сүр жавхлантай өндөрлөлөө.

Уг наадмын сүүлчийн өдөр буюу 7 сарын 12 нд наадам өндөрлөхөд үндсэн төрөл морь, бөх, сур шагайн харвааны шилдгүүд тодорсон юм аа. Хүй долоон худагт соёолон морьд, дааганы уралдаан болоход зургаан нас дотроо хамгийн хурдан гэгдэг соёолонгийн уралдаанд 170 гаруй хурдан хүлэг уралдаж Сэлэнгэ аймгийн Мандал сумын уяач Д.Очирсүрэнгийн хээр соёолон түрүүлсэн бол, дааганы уралдаанд Сүхбаатар аймгийн Дарьганга сумын харьяат  Г.Чинзоригийн хээр даага түрүү магнай боллоо. 

Үндэсний сурын харваанд 540 харваач цэц мэргэнээ сориход эрэгтэйчүүдээс Төв аймгийн Зуун мод клубын харваач аймгийн мэргэн Э.Цогтбаяр эмэгтэйчүүдээс Дундговь аймгийн Дэлгэрхангай сумын харьяат аймгийн мэргэн Ө. Хатанболор нар түрүүлж улсын мэргэн цол хүртэцгэлээ.

Тэгвэл шагайн харваанд 96 багийн 700 гаруй харваач оролцсоноос Улаанбаатар төмөр замын улсын үлэмж дархан мэргэн Л. Болд ахлагчтай баг түрүүлэв. Эдний баг улсын баяр наадамд дөрөвдэх  түрүүгээ авч байгаа нь энэ юм. 

Үндэсний бөхийн барилдаан онц сонирхолтой бөх сонирхогчдын таавар эвдсэн шинжтэй бол эр чадал уран мэхээ уралдуулан барилдхад 512 хүчтэнээс Хэнтий аймгийн Өмнөдэлгэр сумын харьяат улсын арслан Э.Оюунболд хоёр дахь түрүүгээ авснаар Монгол улсын 24 дэх аварга цолтон боллоо. Увс аймгийн Ховд сумын харьяат аварга Н.Батсуурь үзүүрлэв. Мөн улсын харцага цолтон нэгээр нэмэгдсэн нь Дорнод аймгийн Дашбалбар сумын харьяат улсын начин Д.Анар байсан бол Өвөрхангайн Д.Цэдэнсодном, Хөвсгөлийн А.Давааням, Сэлэнгийн Б.Орхонбаяр, Г.Баярбаатар, Увсын Ж.Ням-Эрдэнэ нарын аймгийн таван арслан улсын баяр наадамдаа тав давж улсын начин болсон байна.  

Эх сурвалж: www.polit.mn 

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ