Ерөнхийлөгч, Ерөнхий сайд нар хамтдаа спортын бүтээн байгуулалттай танилцлаа

2019-05-27

Монгол Улсын Ерөнхийлөгч Х.Баттулга, Монгол Улсын Ерөнхий сайд У.Хүрэлсүх, Байгаль орчин, аялал жуулчлалын сайд Н.Цэрэнбат, Боловсрол, соёл, шинжлэх ухаан, спорт сайд Ё.Баатарбилэг, Нийслэлийн Засаг дарга бөгөөд Улаанбаатар хотын захирагч С.Амарсайхан нар өчигдөр “Азийн хүүхдүүд-2020”, Зүүн Азийн залуучуудын 2023 оны наадмын тосгоны спортын бүтээн байгуулалтуудын ажлын явцтай танилцаж, зарим асуудлыг шийдвэрлэхээр ярилцав.

Нийслэлийн Хан-Уул дүүргийн 8-р хороо, “Буянт-Ухаа” спорт цогцолборын эсрэг талд спортын наадмын тосгоны бүтээн байгуулалтууд хуваарийн дагуу үргэлжилж байгаа бөгөөд битүү дээвэртэй мөсөн ордон, усан бассейн, хөлбөмбөгийн талбай барих ажлууд хийгдэж байгаа юм.

“Степпе Арена” ХХК-ийн “Мөрөөдөл биелэх-Мөсөн өргөө” ордны бүтээн байгуулалт шав тавьснаас хойш 41 дэх хоног дээрээ нарийн төлөвлөгөөний дагуу амжилттай явагдаж, товлосон цагтаа ордноо нээхээр барилгачид цаг наргүй ажиллаж байгаа хэмээн “Мөсөн өргөө” төслийн санаачлагч П.Цагаан хэлсэн юм.

Монголын хөлбөмбөгийн холбооны Ерөнхий нарийн бичгийн дарга Ө.Шижирийн танилцуулснаар 115м х 85м хэмжээтэй ногоон зүлгэн талбайн ажил хуваарийн дагуу үргэлжилж, тоног төхөөрөмж угсрах шатандаа оржээ.

Мөн 50м бассейн бүхий олон улсын стандартын усан спортын цогцолборын суурийн ажил саадгүй үргэлжилж байгаа тул энэ жилдээ багтаан битүүлж, дулаанаа татахаар төлөвлөсөн байна. Ингэснээр өвлийн улиралд дотоод заслын ажлыг амжуулж, ирэх оны долдугаар сард ашиглалтад өгөхөөр төлөвлөжээ.

Дээрх спортын ордон, талбайнуудыг барихад Монгол Улсад үйлдвэрлэдэггүй бараа, материалыг гаалийн татвараас чөлөөлөх, хөнгөлөх асуудал тулгамдаж байгаа юм байна. БСШУС-ын сайд Ё.Баатарбилэг Монгол Улсад үйлдвэрлэдэггүй бараа, материалд гаалийн хөнгөлөлт үзүүлэх боломжтой гэсэн бөгөөд энэ асуудлаар үргэлжлүүлэн ярилцахаар болсон юм.

Монгол Улсын Ерөнхий сайд У.Хүрэлсүх Яармагийн дэнжийг хүүхэд залуусын чөлөөт цагаа өнгөрөөх, бие бялдарын өв тэгш хөгжилтэй болоход түлхэц болох, тэдний ирээдүйд хөрөнгө оруулсан спортын томоохон цогцолбор болно хэмээн төсөөлж байгаа гээд Улаанбаатар хотын захирагч С.Амарсайхантай Яармагийн дэнж орчмыг хэрхэн төлөвлөж байгаа асуудлаар ярилцлаа.

Монгол Улсын Ерөнхийлөгч Х.Баттулга Дархан цаазат газар аялал жуулчлалын цогцолбор барина гэж газар аваад орон сууцны хороолол барьж, хууль зөрчиж байгаад онцгойлон анхаарал хандуулахыг дагалдан яваа сайд нарт анхаарууллаа.

Ерөнхийлөгч, Ерөнхий сайд хоёр спортын бүтээн байгуулалтаа амжилттай хийж байгаа барилгачдад амжилт хүсээд дээрх бүтээн байгуулалтуудыг хийхэд төр захиргааны аль байгууллага хүнд суртал, дарамт шахалт үзүүлэхгүй байх, мөн бүх талаар дэмжлэг үзүүлэхийг  холбогдох сайд дарга болон бусад албаныханд сануулсан юм. Ерөнхий сайд У.Хүрэлсүх дээрх спортын бүтээн байгуулалтуудын явцтай ирэх долдугаар сард дахин ирж танилцахаа мэдэгдэв.

Ерөнхийлөгч, Ерөнхий сайд хоёр холбогдох салбарын сайд, дарга нартай хамтдаа ийнхүү спортын бүтээн байгуулалтуудтай газар дээр нь ирж танилцаж, барилгачдтай уулзаж зарим асуудлыг шийдвэрлэхээр болсонд барилгачид маш талархаж байгаа хэлж байлаа.

 

Эх сурвалж: mminfo.mn

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

  • 1 сар

    МӨСӨН ӨРГӨӨГҮЙ БОЛ ҮХЛЭЭ ЮУ? УТААГАА АРИЛГАХГҮЙ БОЛ ҮХЛЭЭ? УТААГ АРИЛГАХЫН ТУЛД ГЭР ХОРООЛЛОО БАГАСГААЧ  ХОВДОГ ШУНАХАЙ ТЭНЭГ ДАРГА НАРАА

Холбоотой мэдээ