Залуу хүн бүрийн амьдралыг аврах саятнуудын 24 шилдэг дадал

2019-06-06

Ж.ЦОГЗОЛМАА

Нас биед хүрнэ гэдэг нэг зүйл. Харин бие даасан хүн болж томчуудын ертөнцөд өөрийгөө илэрхийлж, хэрэгтэй хүн гэж тооцогдоно гэдэг өөрөө бас нэг өөр зүйл аж. Тэгвэл 20 нас хүрсэн “том хүмүүс” 30 насны босго давахаасаа өмнө дараах амьдралын чадваруудыг эзэмшиж чадвал илүү хялбар амжилтад хүрнэ гэдгийг судлаачид сануулж байна. Мэдээж, өөрийгөө олж нээж, нас биед хүрсэн бие даасан хүн болоход тусгайлан гаргасан гарын авлага гэж байхгүй. Харин ойлгож авах ёстой хэдэн зарчмын ойлголт гэж бий. Ядаж л та ажлын ярилцлагад орохдоо бараг хөхөө гаргасан, орэнж өнгөтэй бариу цамц өмсөөд байж болохгүй биз дээ. Эдгээрээс авахуулаад олон зүйлийг энд нэрлэж болох билээ.

Иймд бид 20 нас хүрсэн хэн бүхэнд зориулан арван жилийн дараа хэтэвчээ зузаан байлгахад туслах амьдралын 24 чухал чадварыг хуваалцаж байна.

1.Санал, шүүмжлэлийг таатай хүлээн авч сурах

“Бидний олонх нь хэн нэгний алдаа дутагдал эсвэл аль чадлаараа хийсэн сайхан зүйлсийн тухай тэвчээртэй сонсохдоо маруухан байдаг” гэж Америкийн асуулт, хариултын нэгдсэн сайт Quora-гийн хэрэглэгч Педрам Кеяни бичжээ. “Танд илэрхийлж буй бусдын санал хүсэлт, ер нь ямар ч төрлийн мэдээллийг тааламжтайгаар, таатай сэтгэл хөдлөлөөр хүлээж авдаг байх нь маш чухал чадвар юм. “Үнэмшилтэй, эсвэл анхнаасаа худал байсан ч хамаагүй та тухайн асуудалд амиа бодсон хандлагаар биш харин тархи, оюун ухаанаараа шийдвэр гаргаж, хариулт өгөх нь чухал” гэж тэрээр бичжээ.

Мэдээж, ямар төрлийн мэдээлэл, санал гомдол хүлээж авч байгаагаас энэ нь хамаарна л даа. Тиймээс ч тухайн үе бүрт ялгаатай стратеги баримталж, зөв хариулт болон шийдвэр гаргаж чадна гэсэн үг. Жишээ нь, дарга чинь буруу зүйл бодоод байдаг, та үүнийг нь дагахыг хүсэхгүй байж болно. Энэ тохиолдолд та “Би энэ тухай бодож амжаагүй байсан юм аа. Яг одоо хараадахъя” гэж хэлж болох юм.

2.Чин сэтгэлээсээ уучлалт гуйх

Чин сэтгэлээсээ уучлалт гуйх нь байгаль эхээс хүнд заяагдсан төрөлхийн чадвар биш харин олдмол зүйл гэсэн андуурал түгээмэл байдаг.

Уучлалт гуйна гэдэг чин сэтгэлийн зүйл болохоос биш хэн нэгнээр шаардуулж, гуйлгаж, албадлагаар хийгддэг хиймэл хэв маяг биш гэдгийг ойлгох хэрэгтэй хэмээн Uber-ийн инеженерийн асуудал хариуцсан захирал Педрам Кеиани хэлжээ. Хэн нэгний сэтгэлийг шархлуулалгүйгээр, амжилттайгаар өөрийгөө илэрхийлэх уучлалт гуйх зургаан алхмыг тэрээр санал болгож байна:

-Хурдан сэтгэн бодож хөдөл.
-Тухайн хүнээсээ чин сэтгэлээсээ өршөөл, уучлал хүс.
-Дараа нь чухам юу болсныг учирлан тайлбарлаарай.
-Ирээдүйд гарах асуудал, бэрхшээлээс сэргийлэхийн тулд чин сэтгэлээсээ хичээж байгаагаа илэрхийл.
-Өршөөл, уучлалт хүс.
-Тухайн хүндээ сайхан зүйл хүс, бас сайхан зүйл хийж өгөх буюу сайхан зүйл бэлэглэ.
-Харин уучлал гуйхад нэгэнт оройтчихсон, эсвэл та хожимдсон байвал ямар боломж байгааг Кеиани жишээгээр ийн тайлбарлав:

“Уулзалтандаа хоцорсныг минь уучлаарай. Үнэхээр таны сэтгэлийг гонсойлгосон муухай зүйл боллоо. Та намайг ирнэ гэж маш их зүйл бэлдэж, надаас эрт ирээд хүлээж байхыг хүссэн байх. Би замын түгжрэл болон ажил дээрээсээ хэдэн цагаас гарвал зохих талаар огтоосоо сайн төлөвлөөгүй байна. Энэ бүгдийг төлөвлөж чадаагүй нь миний л буруугийнх. Би маш муу байлаа. Би ердөө л гарахаар төлөвлөсөн цагаасаа 10 минутын өмнө гарчихсан бол ийм юм болохгүй байлаа” гэх байдлаар тайлбарлавал хүний сэтгэлд шарх үүсгэлгүйгээр асуудлыг шийдэх боломжтой гэж тэрээр зөвлөж байгаа юм.

3.Цаг хугацаагаа маш ухаалгаар төлөвлөж, зарцуул

Та хэзээ ч нэг биеэ хэд хэд хуваагаад, хэд хэдэн байршилд зэрэг байж чадахгүй нь ойлгомжтой. Эсвэл хэд хэдэн хүлээн авалтад зэрэг очиж, зэрэг зэрэг хамгийн сайхан зуушийг нь цадталаа идэж чадахгүй. Үргэлж яарч давчдаж, эсвэл олдсон боломжуудаа хажуугаараа салхи шиг өнгөрөөхгүй л гэж бодож байгаа бол цагийн менежментийг сурах нь хамгийн чухал алхам болох юм.

Магадгүй цаг төлөвлөх хамгийн чухал хичээл бол төлөвлөсөн цаг хугацаандаа тухайн зорилгоо биелүүлэхэд суралцах байж болох билээ. Судалгаагаар нэг дор олон ажил хийх гэж оролдох нь хоёр туулай хөөсөн хүн хоосон хоцрохын үлгэр болоод дуусдагийг тогтоосон байдаг. Учир нь тархи нэг төвлөрсөн зүйлээсээ нөгөөд шилжихийн тулд дасан зохицох хэрэгтэйн дээр илүү эрчим хүч зарцуулах шаардлагатай болдог аж.
Тэгэхээр та маш ухаалаг байж, ажил бүрээ тодорхой цаг хугацаагаар хязгаарлаж, дараагийн ажилдаа төвлөрөх боломжийг тархиндаа олгох ёстой юм. Арван жилийн өмнө Генри Форд өндөр бүтээмж, үр шимтэй ажлаа эхлэхийн өмнө ажилчдаа долоо хоногт дор хаяж 40 цаг завсарлахыг үүрэгддэг байжээ. Бусад судалгаагаар гурван долоо хоногийн дараа буюу ажлын долоо хоногийн 60 цагийн дараагаас ажилчдын бүтээмжтэй байдал буурдаг гэдгийг тогтоожээ.

4.Компьютерийн товчлууруудыг ашиглаж чаддаг байх

“Одоо ихэнх ажил дандаа компьютер дээр хийгддэг болоод байна. Тиймээс хаана, юу хийдгээсээ үл хамааран компьютерийн товчлууртай ажиллаж чаддаг байх нь өнөөгийн хүмүүсийн наад захын чадах ёстой зүйл болоод байна. Энэ чадварыг эзэмшсэн хүн асар их цаг хугацаагаа хэмнэнэ” гэж компьютер тоглоомын идэвхтэй оролцогч, програмист Арпит Жэйн хэллээ. Тэрээр асуулт хариултын Quora сайтад компьютерийн товчлууртай хэрхэн ажиллах талаар зарим мэдээллийг оруулсан байлаа. Жишээ нь, “Alt” ба “F4” товчийг хамт дарснаар тухайн сонгон ажиллаж байгаа програм эсвэл хэрэглээний зүйлээ хаах комманд болдог байна. Тэгэхээр хаана нэгтээ явж байгаад компьютер дээр ажиллаж байсан програмаа хаах боллоо гэвэл дээрх үйлдлийг хийгээрэй.

5.Хүндэтгэлтэйгээр “Үгүй” гэж хэлж бай

Бидний олонх нь “Үгүй” гэж хэлэхээсээ айдаг. Яагаад гэвэл бид хүмүүсийг гуниглуулахыг хүсдэггүйд л учир нь байгаа юм. Гэвч та хэдийнэ гэртээ харих гээд хамаг юмаа бэлдчихсэн, гэрийнхнийгээ хоолоо аягалчихаад байж бай гээд хэлчихсэн байхад хамт ажилладаг хүн чинь “Ганцхан цаг суугаад миний төсөл дээр туслаад өгөөч” гэвэл “Тэгэлгүй яахав, мэдээж” гэж хариулах нь оновчтой сонголт биш юм.

“Залхтал сонссон л байх та. Гэхдээ “Үгүй” гэж хэлэх нь таны маш их цаг хугацааг хэмнэдэг. Бас таныг алдаа гаргах, сандрах, хэн нэгний өмнө буруутан болох гээд олон зүйлээс авардаг юм шүү” гэж интерпренер, маркетер Иоги Раж бичжээ.
Түүчлэн Quora сайтад хэрхэн “Үгүй” гэж хэлж сурах талаар “TheHappyTalent.com” сайтын блоггер, сэтгэл судлаач Эва Глэсрад “Бид “Үгүй” гэдэг үгний утгыг хэтрүүлж ойлгох нь энгийн үзэгдэл болчихоод байна” гэжээ.
Глэсрадын үзэж буйгаар, тухайн саналаас итгэлтэйгээр татгалзах хамгийн чухал арга бол та хэзээ ч эргэж ирэхгүй цаг хугацаагаа алдаж байгаагаа ухаж ойлгоход орших юм. Таны цаг хугацаа, таны эрүүл мэнд, таны эрдэм чадал, таны амьдрал гээд энэ бүх зүйлээ та хэзээ ч дахин эргүүлж олж авч чадахгүй. Эргэн тойронд тань байгаа энэ гайхалтай сайхан зүйлсээ алдаж, орхихыг өөртөө бүү зөвшөөр. Хүмүүс танаас юм хүсэх нь хэвийн үзэгдэл, бас тэд таныг чадна гэж бодоод, эсвэл танаас өөр хүн үүнийг чадахгүй гээд л хүсч байгаа. Энэ бол бидний эргэн тойронд байдаг тогтсон үзэгдэл. Тиймээс ч та “Үгүй” гэж хэлэх нь бас л энгийн зүйл юм.

6.Бусдын оронд өөрийгөө тавьж үзэх

Quora сайтын маш олон хэрэглэгч бусдын оронд өөрийгөө тавьж үзэж, тэдний нөхцөл байдлыг өөрийнх нь зовлон бэрхшээл юм шиг ойлгож тусгах хандлага илэрхийлдэг билээ. Сэтгэл судлаачдын хэлж буйгаар бусдын оронд өөрийгөө тавьж үзэх нь хүн байхын үндсэн утга учир аж. Үнэн хэрэгтээ бусдын доторхыг мэдэрдэггүй, сэтгэлийнх нь шаналал, баяр хөөрийг хуваалцаж чаддаггүй хүмүүс ихэвчлэн өөрөөрөө аархаж, бахдагчид байдаг билээ.

7.Биеийн хэлээр түвэггүй ойлголцдог байх

“Заримдаа таныг амаа нээхээс өмнө үйл хөдлөл чинь таны тухай бүх зүйлийг хэлээд, тантай ярилцсанаас дутуугүйгээр ойлгуулж чаддаг” гэж шууд нэвтрүүлгийн хөтлөгч Дийн Бохари бичжээ. Шинжээчид ч биеийн хэл тухайн хүнийг илэрхийлэх маш чухал хэмжүүр гэдгийг онцолдог билээ.

Түүнчлэн хацар, нүүрээрээ хэт оролдох нь таныг худлаа хэлж байна хэмээн илтгэдэг аж.

Та ч бас үүний адилаар бусдын биеийн хэлийг “уншиж” тэд юу бодож, мэдэрч байгааг ойлгож болох юм. Жишээ нь, таныг ширтэж, элдэв маяг гаргахгүй байгаа хүнтэй ярилцахад энэ ярилцлага амжилттай болно гэж ойлгож болно. Харин нөгөө хүн тань инээгээд байгаа хэр нь нүднээс нь ямар ч баяр хөөр мэдрэгдэхгүй байгаа бол тэр ямар нэг худал зүйл хэлж буйн дохио.

8. Ямар ч нөхцөл байдалд нөхөрсөг байдлыг эрхэмлэх

Подкастер Маийша Ташины хэлж буйгаар нөхөрлөл үүсгэнэ гэдэг нь маш чухал ур чадвар бөгөөд хамгийн зөв сонголт хийхэд тусалдаг байна. Ялангуяа, оюутан, сурагчдад энэ чадвар нь зуслан, кэмпэд найз нөхөдтэй болох хялбар боломж олгодог.

Нөхөрсөг бөгөөд хүнтэй найзлахадаа амархан хүмүүс худалдааны салбарт амжилт олох хандлагатай байдаг. Судалгаагаар өөрийгөө нээн илрүүлэх дуртай, өөрөөсөө шинийг эрж хайх хүсэлтэй хүмүүс нөхөрлөлийг илүү амархан бас илүү таатай арга замаар бүтээдэг байна. Илүү гайхмаар нь ийм хүмүүс хүмүүстэй амархан нөхөрлөх замаар амжилтын тактикаа хэрэгжүүлж байдаг. Ингэснээр хүмүүстэй илүү ойр байж, мэдээллийг илүү ойроос хүлээн авна гэсэн үг билээ.

9.Хувцсаа засварлаад өмсөнө гэдэг бас нэг ухаан

Ажлынхаа цамцан дээр ганц хөөрхөн товч хадчихад илүү үзэмжтэй харагдах юм шиг байна уу. Тэгвэл зүү, утас сүвлээд бариад үз.

“Цамцаа ширээний буланд урчихаад юу хийхээ мэдэхгүй суугаа бол түүнийг нөхөж болох аргуудаас суралцах хэрэгтэй. Товч болоод янз бүрийн загвартай зориулалтын нөхөөсний материалууд байдгийг мэдэх хэрэгтэй. Ингэснээр асар их мөнгөө хэмнэнэ шүү дээ” гэж Иллинойсийн Эванстоны мэргэжлийн боловсрол олгох ZS Associates төвийн гишүүн Зера Алви бичжээ.

10.Хоёр дахь хэл эзэмших

“Хоёр дахь хэл эзэмшиж, өөр нэг хэлээр ярьдаг болох нь юмыг бүхэл бүтэн өөр улс орны хүний нүдээр харж, бодох боломж олгодог” гэж Нои Винелала хэлэв. Хэзээ ч төсөөлж байгаагүй шинэ ертөнцийг гадаад хэл эзэмшсэнээр л хүн олж мэддэг гэж  тэр үзэж байгаа юм.
Гадаад хэл эзэмшсэнээр илүү ухаалаг болж, асуудлыг шийдэхдээ ч илүү шинэлэг аргаар ханддаг аж. Зарим судалгаагаар хоёр хэлээр ярьдаг хүн эрдэм мэдлэг эзэмших өндөр чадвартай гэж үздэг ч зарим судалгаа үүнийг үгүйсгэж байгаа юм.
Гадаад хэл сурах хамгийн шилдэг арга бол тухайн орны хэл, соёл, газар нутгийг чин сэтгэлээсээ сонирхон танин мэдэх юм.

11.Төсвөө яг таг барьж сурах

“Хэчнээн олон хүн ийм амархан юмыг хөтлөөд хийж чаддаггүй юм болж бодохоор гайхмаар санагддаг. Татварт хэдийг төлөх, өөртөө хэдийг нөөцлөх, төлөвлөгдсөн ямар зардлууд байгаагаа мэдэхгүй хүмүүс олон байна” гэж системийн зохион бүтээгч, интерпренер Майлс Файдлмэн бичжээ.

Тиймээс төсвөө зохиож сурцгаая. Business Insider-т өөрсдийн төсвийн төлөвлөлтийг хуваалцсан зарим шилдэг жишээнээс хуваалцаж байна.
Жишээ нь, та ойрын хугацаанд гаргах зардлуудаа төв тооцоолохыг хүсчээ. Хүүхдээ сургуульд оруулах, эсвэл ойрын ирээдүйд эрүүл мэндийн төлөвлөгдөөгүй зардлууд гарч мэдэхийг бас үгүйсгэхгүй. Тэгэхээр эдгээрт зориулан мөнгө тооцож л байхгүй бол та асуудалд орно.

12.Фотошопийн үндсэн үйлдлүүдийг сурах

Хувийн вэбсайтдаа зураг нийтлэхийн төлөө мэргэжлийн хүн дуудахын оронд та өөрөө Фотошопын үндсэн хэдэн үйлдлийг сурчихсан байвал өөрөө үүнийг хийчихнэ.

13.Ганцаараа байх хугацаа өөртөө олгох

Толгой эргэм мэдээллээр дүүрэн нийгмийн сүлжээнээс холдоод ганцаараа байх нэг өдрийг өөртөө заавал гаргаж байгаарай. Төгсөх ангийн сурагчдад зөвлөгөө өгдөг, нийтлэлч, маркетер Брэд Санзенбачер “Би өөртөө ганцаараа байх цаг хугацааг олгосноор зөвхөн би өөрөө чухам юу хүсч байна вэ гэдгээ олж нээн хардаг. Зөвхөн өөрийнхөө хүссэн киног үзэж, зөвхөн өөрийнхөө хүссэн музейгээр аялдаг” гэж бичжээ.

14.Олны өмнө ярих чадвар эзэмших

Заавал шууд нэвтрүүлэг, Talk show-нд орох гэж байгаа юм шиг бэлдэх албагүй ч ажил дээр аль нэг төслийнхөө талаар танилцуулга хийх хэмжээний чадвар эзэмших ёстой. Учир нь олны өмнө ярих чадвараа хурцлах гэж тэр шүү дээ. “Олны өмнө өөртөө итгэлтэй урлагт суралцах нь маш чухал чадвар бий болгодог. Энэ нь нэг дор олон хүнд өөрийнхөө талаар сэтгэгдэл төрүүлэхэд туслах зоригтой алхам хийх хүч өгдөг” гэж гэж чөлөөт нийтлэлч Рамачандра Бакта бичжээ.

Дарга нарт танилцуулга хийх нь танд хар дарсан зүүд шиг санагддаг бол айдсаа даван туулах стратеги ч бас бий гэдгийг мэдэх хэрэгтэй. Нэгэн судалгаанд дурдсанаар өөрийгөө энэ талаар туршлагатай, маш их итгэлтэй хүн мэт өөртөө мэдрүүлж, айдсаа дахин “загварчлах” боломжтой юм байна.

15.Хэлэлцээ, тохиролцоо хийх чадвар

Quora сайтын маш олон хэрэглэгч ямар ч мэргэжилтэй хүн байсан хэлэлцээ, тохиролцоо хийх арга ухаанд суралцах нь маш чухал гэдгийг хэлж байна.

Одоо авч байгаа цалингаа нэмүүлэх хүслээ хэрхэн илэрхийлж, өөрийнхөө талд шийдвэр гаргуулах вэ. Ингэхийн тулд та хүсч буй дүнгээсээ өндөр дүнг санал болгож байж өөрийнхөө хүссэн хэмжээний цалинг тогтоолгож авна гэсэн үг шүү дээ. Жишээ нь, та жилийн цалингаа 100 мянган ам.долларт хүргэхийг хүсч байгаа бол даргадаа “Би 100-120 мянган ам.долларын цалин авмаар байна” гэж хэлэх хэрэгтэй гэсэн үг.
Өөр нэг жишээ ч бий. Хэн нэгэнд өөрийнхөө эд зүйлсийг өгөхдөө тухайн зүйлийнхээ үнэ цэнийг хэлж, тэр хэмжээий мөнгө авч үлдэхийг хүсэх үе гардаг шүү дээ. Ийм тохиолдолд “Би машинаа 10 мянган ам.доллараар үнэлмээр байна” гэж хэлэхийн оронд “Би чамд машинаа ерөөсөө л 10 мянган ам.доллараар өгч байгаа шүү” гэвэл илүү ойр бас хялбар, дотно сонсогдож байгаа биз дээ.

16.Амттай сайхан хоол хийж сурсан байх

Хоолыг зөвхөн нэг л хэлбэр, янз, орцоор хийгээд байх нь амархан уйдах шалтгаан болдог. “Хоол хийх ноу хау нь хамгийн багадаа л та таван төрлийн хоол хийж зочдоо баясгахад байгаа юм шүү дээ” хэмээн АНУ-ын Калифорниа муж дах програм хангамжийн VMware компанийн маркетингийн менежер Эрин Накано бичжээ. “Энэ нь таны удам угсаа ёс заншилтай нягт холбоотой байх хэдий ч ядаж л ногооны салат, өглөөний цай, холимог зууш зэргийг багтаасан байх ёстой. Бас амттаныг ч мартаж болохгүй. Заавал хоолны ном авна гэж үүнийг хойшлуулаад байлгүй өөрийнхөө санаачлагаар хийвэл илүү амттай сайхан хоол болдог” гэж тэрээр үзэж байна.

17.Богинохон ярианд суралцах

Мэргэжил нэгт хүмүүс хурал зөвлөгөөнд оролцох, эсвэл хамгийн сайн мэддэг үдшийн клубт танилцсан хүнтэйгээ ярилцах зэргээр товчхон хэр нь тодорхой яриа хөөрөө хийх боломж бидний амьдралд хэзээд гардаг. Ийм богинохон ярилцлагын хамгийн чухал нь ярилцагчийнхаа хүсэл сонирхлыг олж мэдэхд оршдог бөгөөд түүний өгсөн мэдээллээр тэр хүнээ таньж мэднэ гэсэн үг. Эсвэл нөгөө хүнээ илт хүндэтгэсэн, тал зассан байдал илэрхийлж болно. Ингэснээр тухайн ярилцагч тань таны талаар илүү сайн төсөөлөлтэй үлддэг.

18.Хувийн мэдээлэл, хэрэгтэй файлуудаа найдвартай хамгаалах

Гар утас, зөөврийн компьютерээ алдчихвал бид тэнд байсан хамаг л утасны дугаар, шаардлагатай файлууд, зургууд гээд асар үнэтэй бүхнээ хамтад нь хулгайчид “бэлэглэчихдэг” шүү дээ. Хамаг чухал материалаа алдана гэдэг маш их эрсдэл хүлээнэ гэсэн үг.

Тиймээс хадгалсан материал болон файлууддаа хариуцлагатай хандахыг хичээ. Drive-ууд ухаалаг хэрэглээ болсон учраас тэдгээрт хадгалж сураарай.

19.Тусламж хүснэ гэдэг муу зүйл биш

Ажил дээрээ бяцхан зөвлөгөө, тусламж гуйна гэдэг тийм хэцүү бас ичихээр муу зүйл биш. Судалгаанд дурдсанаар зөвлөгөө хүсэх нь тухайн хүнийг илүү мэргэжлийн, эрдэм мэдлэгт дуртай нэгэн гэж харагдуулдаг байна. Учир нь өөрөөс нь тусламж хүсэхэд тухайн хүн өөрт нь магтаал ирж байна гэж ойлгодог байна.

20.Болзоонд явах

Танихгүй хэр нь сэтгэл татагдсан хүнтэйгээ уулзана гэдэг хэчнээн таатай уур амьсгал вэ. Хоёул бие биенээсээ санаа зовохоо болиод сайхан болзоонд явж яагаад болохгүй гэж. Судалгаагаар эрчүүд болзоонд урихыг хүссэн эмэгтэйдээ “Та тун үзэсгэлэнтэй юм. Таныг уух зүйлээр дайлахыг минь зөвшөөрнө үү” гэж яриа өддөг бол эмэгтэйчүүд яриа эхлэхийг хүсэдхээ “Ямар хамтлагийн дуунд чи дуртай вэ” гэж эрчүүдээс асуух жишээтэй.
Судалгаанд оролцсон цөөн хэдэн хүн л болзоог заавал элдэв зүйлд хязгаарлалгүй, өөрсдийнхөө хүссэнээр эхлүүлэх ёстой гэж үзсэн байна.

21.Ажлын ярилцлаганд зөв хувцаслах

Бид аливаа номыг хавтасных нь өнгө, загвараар шүүх боломжгүй. Гэвч ажлын ярилцлаганд оролцохоор ирсэн хүнийхээ хувцаслалтыг харахгүйгээр эхний дүгнэлтээ гаргадаггүй менежер гэж үгүй.

Тиймээс ажлын ярилцлаганд орохдоо нүүрээ хэт их будаж, эсвэл саравчтай малгай өмсөхөөс татгалзаарай. Үүний оронд харьцангуй даруухан хувцасласан нь илүү дээр. Бүр гутал чинь хүртэл гялалзсан бас цэвэрхэн байх учиртай.
Бас хувцасны чинь өнгө ч хамаатай гэдгийг бүү мартаарай. АНУ-ын хөдөлмөр зуучлалын CareerBuilder төвийн судалгаагаар ажлын ярилцлаганд өмсвөл зохих хувцасны хамгийн тохиромжтой өнгө нь цэнхэр болон хар юм. Харин улбар шар өнгөнөөс шууд татгалзах хэрэгтэй аж.

22.Цагтаа бос

Та хичээл, эсвэл ажил эхлэхээс таван минутын өмнө орноосоо өндийж байгаа бол хоцрох нь баараггүй. Тэгвэл мэргэжлийн мундагуудын ертөнцөд ямар байдаг вэ. Лав л дээрх шиг биш. Тогтмол цагт босч хэвшсэн байх нь маш чухал байдаг. Орой унтах тогтмол цагийн зургилтай учраас амжилттай хүмүүсийн бие өглөөд маш сайн амарсан байдаг аж. Орондоо орохоосоо өмнө бясалгал хийх, халуун шүршүүрт орох зэргээр амрахад бэлтгэдэг байна.
Шинжээчдийн зөвлөж буйгаар өглөөдөө сэрүүлгээр сэрэх эсвэл сэрүүлгээ унтраачихаад үргэлжлүүлэн унтах нь яавч бүтэлтэй хүний шинж биш гэдгийг онцолж байна. Оронд нь сэрүүлгээ дуугарахад нь нэг л удаа унтраагаад, дахин дуугарч дуусах хүртэл нь чанга дуу авианы оронд өнгө өнгийн гэрэл асаах горимтой байлгасан нь илүү зохимжтой аж.

23.Хүнтэй гар барихдаа чанга атга

Нэгэн судалгаанд оролцсон хүмүүсийн 70 хувь нь хүнтэй гар барихдаа зөөлөн атгадаг хүмүүст итгэдэггүй гэж хариулжээ.

Гэтэл та захиралтайгаа анх удаа гар барих болтол яах учраа олохгүй байж байгаад сул атгачихвал өөрийгөө эргэлзээтэй нэгэн гэж ойлгуулж таарах нь.

Иймд хүнтэй гар барих хамгийн зөв стратеги бол сайн атгах юм. Ингэхдээ таны тохой 90 хэмийн налуутай байх ёстой. Бас инээмсэглэж, нүдээрээ ч бас сайхан энерги илэрхийлэхээ мартаж болохгүй.

24.Дугхийхийн ач тус

Ихэнх хүн 7-8 цаг унтаж амрах ёстой. Та энэ үгсийг хэдэн мянган удаа сонссон байх. Гэвч ажлын цаг, гэр бүлийнхэндээ гаргах цаг хугацаа, Facebook-т ирсэн санал хүсэлт, мэсэжинд хариулах зэргийг тооцвол танд үүнээс ч олон цагаар унтах шаардлага бий байж мэдэх юм.
Тиймээс дугхийх хүчийг ашиглаж сур. 10-хан минут хэртэй л суугаагаараа дугхийх нь эргээд маш хурдан сэргэх боломж олгодог. Энэ товчхон нойрсолт таныг бүхэл шөнийн турш сайн амарчихсан юм шиг сайхан мэдрэмж, эрч хүч бэлэглэдэг юм шүү.

Эх сурвалж: Business Insider сайтад нийтлэгдсэн билээ.

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ